स्वातंत्र्यदिनाच्या कार्यक्रमात राष्ट्रीय गीताला विशेष महत्त्व.
शासकीय कार्यालये, शाळा-महाविद्यालयांत ‘वंदे मातरम्’चे गायन.
नांदगाव खंडेश्वर / उत्तम ब्राम्हणवाडे
स्वातंत्र्यदिनानिमित्त नांदगाव खंडेश्वर तालुक्यात यंदा ‘वंदे मातरम्’ला विशेष महत्त्व प्राप्त झाले. तालुक्यातील सर्वच शासकीय कार्यालये, शाळा-महाविद्यालये आणि विविध शैक्षणिक संस्थांमध्ये स्वातंत्र्यदिन उत्साहात साजरा करण्यात आला. उपविभागीय अधिकारी कु. सोनल संगीता रमेश सूर्यवंशी यांचे हस्ते तहसील कार्यालयात ध्वजारोहण करण्यात आले.तहसीलदार सौ.अश्विनी जाधव यांच्या सह सर्व अधिकारी कार्यक्रमात उपस्थित होते.यावेळी अधिकारी, कर्मचारी, शिक्षक आणि विद्यार्थ्यांनी प्रथमतःच‘वंदे मातरम्’चे गायन केले. त्यामुळे विविध ठिकाणी देशभक्तीचे वातावरण निर्माण झाले.
नांदगाव खंडेश्वर येथील नगरपंचायत, तहसील कार्यालय, पंचायत समिती, पोलिस ठाणे यासह सर्वच विविध शासकीय कार्यालयांमध्ये सकाळपासून स्वातंत्र्यदिनाच्या कार्यक्रमांची लगबग सुरू होती. ध्वजारोहणानंतर उपस्थितांनी ‘वंदे मातरम्’ गायले. त्यानंतर राष्ट्रगीत ‘जन गण मन’चे गायन करण्यात आले, तर महाराष्ट्र गीताने कार्यक्रमाची सांगता करण्यात आली.
‘वंदे मातरम्’चे सूर सुरू होताच उपस्थितांमध्ये देशभक्तीची भावना दिसून आली. अधिकारी, कर्मचारी आणि नागरिकांनी उत्स्फूर्तपणे गीतात सहभाग घेतला. रोजच्या शासकीय कामकाजाच्या वातावरणाला काही काळ विराम मिळत देशभक्तीच्या सुरांनी कार्यालय परिसर दुमदुमून गेला.तालुक्यातील शाळा आणि महाविद्यालयांमध्येही विद्यार्थ्यांनी स्वातंत्र्यदिन मोठ्या उत्साहात साजरा केला. ध्वजारोहण, देशभक्तीपर गीते, भाषणे आणि सांस्कृतिक कार्यक्रमांसोबत विद्यार्थ्यांनी ‘वंदे मातरम्’चे गायन केले. शिक्षकांनी विद्यार्थ्यांना या गीताचा ऐतिहासिक संदर्भ सांगत स्वातंत्र्यलढ्यातील त्याचे महत्त्व, राष्ट्रीय एकात्मता आणि देशाप्रती असलेल्या कर्तव्याची जाणीव करून दिली.यावेळी संपूर्ण देशात ध्वजारोहण करताना वंदे मातरम् गीतांचे गायन करण्याचा कायदा भारतीय संसदेत पारित करण्यात आल्यानंतर या गीताला अनन्यसाधारण महत्व प्राप्त झाले आहे.
स्व.बंकिमचंद्र चट्टोपाध्याय यांनी १८७५ यावर्षी यांनी रचलेल्या ‘वंदे मातरम्’ने भारतीय स्वातंत्र्यलढ्यात महत्त्वाची भूमिका बजावली. या गीताने स्वातंत्र्यसैनिक आणि देशवासीयांमध्ये राष्ट्रप्रेमाची भावना जागृत केली. त्यामुळे स्वातंत्र्यदिनाच्या कार्यक्रमात या गीताचे गायन झाल्याने स्वातंत्र्यलढ्याच्या आठवणींना उजाळा मिळाला.
दरम्यान, ‘वंदे मातरम्’च्या १५० व्या वर्षपूर्तीच्या पार्श्वभूमीवर केंद्र सरकारने देशभर विविध कार्यक्रमांचे आयोजन केले आहे. पंतप्रधान नरेंद्र मोदी यांच्या नेतृत्वाखालील केंद्र सरकारने या गीताच्या ऐतिहासिक महत्त्वावर विशेष भर दिला आहे. या गीताला राष्ट्रीय गीताचा दर्जा देऊन हे गीत गायन सक्तीचे केले.तसेच २०२६ मध्ये ‘राष्ट्रीय सन्मानाच्या अवमानास प्रतिबंध कायदा सुधारणा विधेयक’ संसदेत मांडण्यात आले असून ‘वंदे मातरम्’ला कायदेशीर संरक्षण देण्याचा प्रस्ताव त्यात आहे. त्यामुळे यंदाच्या स्वातंत्र्यदिनाच्या कार्यक्रमात ‘वंदे मातरम्’च्या गायनाला विशेष महत्त्व प्राप्त झाले.
‘वंदे मातरम्’नंतर राष्ट्रगीत ‘जन गण मन’ आणि त्यानंतर महाराष्ट्र गीताचे गायन झाल्याने राष्ट्रीय भावना आणि महाराष्ट्राच्या अस्मितेचा सुंदर संगम पाहायला मिळाला. स्वातंत्र्यदिन हा केवळ ध्वजारोहणाचा दिवस नसून देशाच्या स्वातंत्र्यासाठी बलिदान देणाऱ्या स्वातंत्र्यसैनिकांचे स्मरण करण्याचा दिवस आहे. यंदा ‘वंदे मातरम्’च्या गायनामुळे या भावनेला नांदगाव खंडेश्वर तालुक्यात अधिक बळ मिळाले.एकंदरीत, तालुक्यातील विविध शासकीय कार्यालये, शाळा-महाविद्यालये आणि संस्थांमध्ये ध्वजारोहणासोबत ‘वंदे मातरम्’चे गायन झाल्याने स्वातंत्र्यदिनाचा सोहळा देशभक्तीच्या वातावरणात पार पडला. यावेळी उपस्थितांनी उत्स्फूर्तपणे गायलेल्या ‘वंदे मातरम्’च्या सुरांनी यंदाच्या स्वातंत्र्यदिनाला वेगळीच ओळख मिळवून दिली.
