बदलत्या हवामानाचा नागरिकांना अनुभव; सकाळी आल्हाददायक वातावरण,
तर दुपारी उन्हाच्या तीव्रतेत वाढ; ऋतुबदलाची चाहूल
नांदगाव खंडेश्वर / उत्तम ब्राम्हणवाडे
नांदगाव खंडेश्वर तालुक्यात सध्या हवामानात बदल जाणवू लागला असून सकाळी आणि संध्याकाळी वातावरणात आल्हाददायक गारवा अनुभवायला मिळत आहे. मात्र, जसजसा दिवस पुढे सरकतो, तसतशी उन्हाची तीव्रता वाढत असून दुपारच्या वेळी उन्हाचा चटका नागरिकांना सहन करावा लागत आहे. सकाळी गारवा आणि दुपारी उन्हाचा तडाखा अशा संमिश्र वातावरणाचा अनुभव सध्या तालुक्यातील नागरिक घेत आहेत.
त्यामुळे नोव्हेंबर महिन्याच्या उत्तरार्धातही उन्हाचा प्रभाव कायम असल्याचे चित्र दिसून येत आहे.पहाटेच्या वेळी घराबाहेर पडताना थंडगार वारा आणि प्रसन्न वातावरण मनाला सुखावणारे ठरत आहे. सकाळी फिरायला जाणारे नागरिक, व्यायामप्रेमी,मॉर्निंग वॉक करणारे ज्येष्ठ नागरिक तसेच शेतातील कामासाठी लवकर बाहेर पडणाऱ्या शेतकऱ्यांना या गारव्याचा आनंद मिळत आहे. विशेष म्हणजे सकाळच्या वेळी वातावरणात जाणवणारा गारवा आणि दुपारच्या वेळी जाणवणारी उष्णता यामुळे दिवसातील तापमानात मोठी तफावत जाणवत आहे.दुपार होताच मात्र परिस्थिती बदलत असून सूर्याची किरणे तीव्र होऊ लागतात. दुपारी बारा ते चार या वेळेत उन्हाचा चटका अधिक जाणवत असल्याने नागरिकांना घराबाहेर पडताना काळजी घ्यावी लागत आहे. बाजारपेठेतही दुपारच्या वेळी नागरिकांची वर्दळ काहीशी कमी होत असल्याचे चित्र पाहायला मिळत आहे. अत्यावश्यक कामाशिवाय अनेकजण दुपारच्या उन्हात बाहेर पडणे टाळत आहेत.या बदलत्या वातावरणाचा सर्वाधिक परिणाम दिवसभर बाहेर काम करणाऱ्या नागरिकांवर होत आहे. शेतकरी, शेतमजूर,बांधकाम कामगार, फेरीवाले, हातगाडीधारक तसेच दुचाकीवरून प्रवास करणाऱ्या नागरिकांना दुपारच्या उन्हाचा सामना करावा लागत आहे. सकाळच्या गारव्यात कामाला सुरुवात करणाऱ्या शेतकऱ्यांना दुपारच्या उन्हामुळे कामाचे नियोजन बदलावे लागत आहे. त्यामुळे शेतीची कामे शक्यतो सकाळच्या वेळेत पूर्ण करण्याकडे ग्रामीण भागातील शेतकऱ्यांचा कल दिसून येत आहे.दुसरीकडे संध्याकाळच्या वेळी सूर्यास्तानंतर पुन्हा वातावरणात काहीसा गारवा निर्माण होत असल्याने नागरिकांना दिलासा मिळत आहे. दिवसभराच्या उकाड्यानंतर संध्याकाळी मोकळ्या हवेत फिरण्यासाठी नागरिक घराबाहेर पडताना दिसत आहेत. लहान मुले, ज्येष्ठ नागरिक आणि कुटुंबांसाठी संध्याकाळचे वातावरण तुलनेने सुखद ठरत आहे.हवामानातील या सततच्या बदलामुळे नागरिकांनी आपल्या आरोग्याची काळजी घेणे आवश्यक आहे. सकाळी आणि संध्याकाळी गारवा जाणवत असला तरी दुपारी उन्हाची तीव्रता लक्षात घेऊन पुरेसे पाणी पिणे, उन्हात जास्त वेळ थांबणे टाळणे आणि बाहेर पडताना डोक्याचे संरक्षण करणे गरजेचे आहे. विशेषतः लहान मुले आणि ज्येष्ठ नागरिकांनी बदलत्या हवामानात अधिक काळजी घेण्याची आवश्यकता आहे.एकीकडे थंडीची चाहूल लागल्याने नागरिकांना हिवाळ्याचे वेध लागले आहेत, तर दुसरीकडे दुपारच्या उन्हाचा चटका अद्याप कमी झालेला नाही. त्यामुळे नांदगाव खंडेश्वर तालुक्यात सध्या सकाळ-संध्याकाळ गारवा आणि दुपारी उन्हाचा तडाखा असे दुहेरी हवामान अनुभवायला मिळत आहे. आगामी दिवसांत थंडीचा प्रभाव वाढतो की दुपारचे ऊन असेच कायम राहते, याकडे तालुक्यातील नागरिकांचे लक्ष लागले आहे.
