अमरावती/जिल्हा प्रतिनिधी
घरातील प्रत्येक व्यक्तीच्या दिवसाची सुरुवात अनेकदा जिच्या हातून होते आणि रात्री सर्वजण शांत झोपल्यानंतरही जिच्या मनात उद्याच्या दिवसाचे नियोजन सुरू असते, ती म्हणजे गृहिणी. घरातील प्रत्येकाच्या गरजा, आवडीनिवडी, सुख-दुःख आणि जबाबदाऱ्या सांभाळताना ती स्वतःसाठी किती वेळ जगते, हा प्रश्न मात्र अनेकदा अनुत्तरित राहतो.
३ नोव्हेंबर हा राष्ट्रीय गृहिणी दिन. घर सांभाळणाऱ्या, कुटुंबाला एकत्र बांधून ठेवणाऱ्या आणि आपल्या निःस्वार्थ प्रेमाने घराला घरपण देणाऱ्या प्रत्येक स्त्रीच्या कार्याची जाणीव करून देणारा हा दिवस.गृहिणी म्हटले की आपल्या डोळ्यांसमोर घरातील कामात व्यस्त असलेली स्त्री उभी राहते. मात्र तिच्या कामाचा आवाका केवळ स्वयंपाकघरापुरता मर्यादित नसतो. घराचे आर्थिक नियोजन, मुलांचे संगोपन, ज्येष्ठांची काळजी, नातेसंबंध जपणे, घरातील प्रत्येकाच्या भावनांचा विचार करणे, अशा कितीतरी जबाबदाऱ्या ती सहजपणे पेलत असते.तिचा दिवस पहाटे सुरू होतो. घरातील प्रत्येकाच्या वेळा सांभाळताना स्वतःच्या वेळेचा विचार करायलाही तिला अनेकदा फुरसत मिळत नाही. मुलांना शाळेत पाठवणे, डबा तयार करणे, घरातील कामे उरकणे, आजारी व्यक्तीची काळजी घेणे आणि पाहुण्यांचे स्वागत करणे, या सगळ्या गोष्टी तिच्या रोजच्या जीवनाचा भाग असतात.तिचे हे काम पाहताना अनेकदा अष्टभुजा देवीची आठवण होते. प्रत्येक हातात वेगवेगळे काम आणि तरीही चेहऱ्यावर समाधानाचे हसू! गृहिणीचे अष्टभुजा स्वरूप हे केवळ एक सुंदर प्रतीक नाही, तर तिच्या रोजच्या जगण्याचे वास्तव आहे.सणासुदीच्या दिवसांत तर तिच्या कामाला अधिकच वेग येतो. दिवाळीच्या फराळापासून घराच्या सजावटीपर्यंत, पाहुण्यांच्या स्वागतापासून प्रत्येकाच्या आवडीचे पदार्थ बनवण्यापर्यंत ती सतत कार्यरत असते. घरातील सर्वजण सणाचा आनंद घेत असताना त्या आनंदामागे तिची किती मेहनत असते, याचा विचार आपण किती वेळा करतो?
गृहिणीच्या कामाला ठरावीक वेळ नसतो. रविवारची सुट्टी नसते आणि आजारी पडल्यावरही घरातील कामे तिची वाट पाहत असतात. तिच्या कामाला वेतन नसते, पण तिच्या योगदानामुळे संपूर्ण कुटुंबाचे जीवन सुरळीत चालत असते.अनेकदा तिच्या कामाचे कौतुक करताना आपण म्हणतो, “तू घरासाठी किती करतेस!” पण तिच्या मनातही काही इच्छा, स्वप्ने आणि अपेक्षा असतात, हे लक्षात घेणे तितकेच महत्त्वाचे आहे.तिला कधीतरी स्वतःच्या आवडीचे काम करावेसे वाटते. मैत्रिणींशी मनमोकळ्या गप्पा माराव्याशा वाटतात. एखादे पुस्तक वाचावे, फिरायला जावे किंवा शांतपणे स्वतःसाठी थोडा वेळ घालवावा, असे तिलाही वाटते. तिच्या या छोट्या छोट्या इच्छांना समजून घेणे म्हणजेच तिच्या व्यक्तिमत्त्वाचा आदर करणे.आजच्या काळात अनेक गृहिणी घर सांभाळण्यासोबत विविध व्यवसाय, सामाजिक कार्य, शिक्षण आणि इतर क्षेत्रांतही आपले योगदान देत आहेत. काही स्त्रिया आर्थिकदृष्ट्या स्वावलंबी आहेत, तर काही घरातील जबाबदाऱ्यांमुळे स्वतःच्या करिअरला विराम देतात. मात्र घर सांभाळणाऱ्या स्त्रीचे योगदान कोणत्याही अर्थाने कमी नाही.राष्ट्रीय गृहिणी दिन हा केवळ शुभेच्छा देण्याचा दिवस नसून आपल्या घरातील स्त्रीच्या कष्टांची जाणीव करून घेण्याचा दिवस आहे. तिच्या कामात मदत करणे, तिच्या निर्णयांचा आदर करणे, तिच्या स्वप्नांना प्रोत्साहन देणे आणि तिच्या भावनांना समजून घेणे, ही प्रत्येक कुटुंबाची जबाबदारी आहे.घरातील कामे ही केवळ गृहिणीची जबाबदारी नसून संपूर्ण कुटुंबाची सामूहिक जबाबदारी आहे. घरातील प्रत्येकाने थोडा हातभार लावला, तर तिच्या चेहऱ्यावरचे समाधान अधिक खुलून येईल.शेवटी एवढेच म्हणावेसे वाटते की, घर सांभाळणाऱ्या या स्त्रीने संपूर्ण कुटुंबासाठी आयुष्यभर अनेक भूमिका निभावल्या असतील. पण या सगळ्या भूमिकांपलीकडे ती एक स्वतंत्र व्यक्ती आहे. तिच्या स्वतःच्या इच्छा आहेत, तिची स्वप्ने आहेत आणि ती पूर्ण करण्याचा तिलाही अधिकार आहे.
तिच्या कष्टांना सलाम, तिच्या प्रेमाला वंदन आणि तिच्या अस्तित्वाला मनापासून सन्मान!
राष्ट्रीय गृहिणी दिनानिमित्त प्रत्येक गृहिणीला मनःपूर्वक शुभेच्छा. तिच्या आयुष्यातही आनंद, समाधान आणि स्वतःसाठी जगण्याचे सुंदर क्षण फुलत राहोत.कारण घराला घरपण देणाऱ्या तिच्या हातांनी स्वतःची स्वप्नेही साकार व्हावीत, हीच खरी सदिच्छा!
— स्मिता ठाकरे, अमरावती
