भाजपमध्ये नगराध्यक्षपदासाठी चुरस 

उमेदवारीवरून कुरघोड्या,गटबाजी आणि रस्सीखेच!

नांदगाव खंडेश्वर / उत्तम ब्राम्हणवाडे

नांदगाव खंडेश्वर नगर पंचायत निवडणूक जसजशी जवळ येत आहे तसतसे शहरातील राजकीय वातावरण चांगलेच तापू लागले आहे.प्रचारयुद्ध सुरू झाल्याने नगराध्यक्षपदासाठी इच्छुक असलेल्या नेत्यामध्ये चुरस निर्माण होत असून, उमेदवाराच्या निवडीवरून भाजपच्या घरातच रस्सीखेच आणि कुरघोड्या सुरू झाल्या आहेत.परिणामी, पक्षश्रेष्ठीसमोर उमेदवार निवडीचा मोठा पेच निर्माण झाला आहे.राज्य निवडणूक आयोगाकडून नुकताच नगर पंचायत निवडणुकीचा कार्यक्रम जाहीर झाल्यानंतर भाजपमध्ये नगराध्यक्षपदासाठी अनेक दिग्गज कार्यकर्ते,पदाधिकारी आणि काही स्वयंघोषित नेते सक्रिय झाले आहेत.सत्ताकाळात निष्क्रीय राहिलेल्या काही जणांनी आता उमेदवारीसाठी हालचालींना वेग दिला आहे. काही महिला पदाधिकारीसुद्धा नगराध्यक्षपदाची उमेदवारी मिळवण्यासाठी प्रयत्नशील असून पक्षांतर्गत गुप्त हालचालींना वेग आला आहे.पक्षांतर्गत सध्या कोणाचेही नाव आघाडीवर नसल्याने, पक्षश्रेष्ठींकडून कमालीची गोपनीयता पाळली जात आहे.

मात्र,या वेळी शहर विकासाला प्राधान्य देणारा,लोकांमध्ये लोकप्रिय आणि तरुणाईला आकर्षित करणारा चेहरा उमेदवार म्हणून द्यावा, अशी मागणी कार्यकर्त्यांतून होत आहे.दरम्यान, काही स्थानिक नेते आणि माजी पदाधिकारी केवळ आमदाराच्या मागे-पुढे फिरून स्वतःची उपस्थिती दाखवत असून आपल्यालाच तिकीट मिळावी याकरिता प्रयत्न करीत आहेत.चमकोगिरी करणाऱ्या कार्यकर्त्यांना तिकीट देण्यात येऊ नये अशी टीकाही कार्यकर्त्यांतून होत आहे. पक्षाच्या नावावर आपले घर भरणारे हेच नेते आता पक्षश्रेष्ठींशी संपर्क साधून उमेदवारीसाठी लॉबिंग करत असल्याची चर्चा रंगली आहे.एकाच जागेसाठी तीन ते चार नावांचा जोर असल्याने भाजपमधील अंतर्गत समीकरणे गुंतागुंतीची बनली आहेत. गटबाजी, जातीय आणि स्थानिक सामाजिक गणित यामुळे उमेदवार निवड हा भाजपसमोर मोठा पेचप्रसंग ठरतो आहे.नांदगाव खंडेश्वर नगर पंचायतीत १७ सदस्यीय बलाबल असून, मागील कार्यकाळात भाजपने राष्ट्रवादी काँग्रेस आणि शिवसेना (मित्रगट) सोबत सत्ता स्थापन केली होती.आता पाच वर्षाच्या सत्ताकालानंतर पुन्हा भाजपला नगराध्यक्षपदाची माळ पुन्हा मिळणार का? हा प्रश्न ऐरणीवर आला आहे.भाजपच्या उमेदवारीच्या शर्यतीत सुरू असलेली चुरस, अंतर्गत गटबाजी आणि गुप्त बैठकांमुळे शहरभर निवडणूक-ज्वर वाढत आहे. काही ज्येष्ठ नेते पक्षश्रेष्ठींशी संबंध दृढ करून उमेदवारी मिळवण्यासाठी प्रयत्न करत आहेत, तर काही तरुण कार्यकर्ते “युथ आयकॉन” चेहरा देण्याची मागणी पक्षाकडे करीत आहेत.आगामी काही दिवसांत भाजपकडून उमेदवारीची अधिकृत घोषणा होण्याची शक्यता असून, त्यानंतर या राजकीय शर्यतीला अधिक वेग मिळेल, अशी चर्चा आहे. सध्या मात्र शहरवासीयांचे डोळे भाजपच्या अंतिम उमेदवारीकडे लागलेले आहेत.नांदगाव खंडेश्वर नगर पंचायत निवडणुकीचा हा रंगतदार सामना तापलेल्या राजकीय वातावरणात आणखी रंग घेईल,यात शंका नाही.