उपकेंद्राला महावितरणचे सीएमडी श्री लोकेश चंद्र यांची भेट
ग्राहकांना अखंडित सेवा देण्यात उपकेंद्राची भूमिका महत्वाची
अमरावती / जिल्हा प्रतिनिधी
“ग्राहकांना दर्जेदार, सुरक्षित आणि अखंडित वीज पुरवठा देण्यात ३३ केव्ही उपकेंद्रांची भूमिका अत्यंत मोलाची आहे. महावितरणच्या ३३ केव्ही लोणी (टाकळी) उपकेंद्रात सक्षमीकरण आणि नूतनीकरणाचे कार्य अत्यंत उत्कृष्ट पद्धतीने पार पाडले गेले असून यामुळेच ISO 9001:2015 चे मानांकन मिळवता आले असल्याचे प्रतिपादन महावितरणचे अध्यक्ष व व्यवस्थापकीय संचालक श्री लोकेश चंद्र यांनी केले.
महावितरणच्या अमरावती जिल्ह्याअंतर्गत लोणी (टाकळी) येथील ३३/११ केव्ही विद्युत उपकेंद्राने ISO 9001:2015 हे आंतरराष्ट्रीय दर्जाचे मानांकन मिळवून परिमंडळातील पहिले ISO प्रमाणित उपकेंद्र बनण्याचा मान मिळवला आहे. महावितरणचे अध्यक्ष व व्यवस्थापकीय संचालक श्री. लोकेश चंद्र यांनी उपकेंद्राला प्रत्यक्ष भेट देऊन पाहणी केली आणि उत्कृष्ट कामगिरीबद्दल समाधान व्यक्त करत उपकेंद्राच्या रजिष्टरला अभिप्रायाची नोंद करून उपकार्यकारी अभियंता जयंत घाटे आणि त्यांच्या संपूर्ण चमूचे कौतूक केले.व्यवस्थापकीय संचालकांच्या या दौर्‍यात प्रादेशिक संचालक श्री. परेश भागवत, सौर कंपनीचे सल्लागार श्री. श्रीकांत जलतारे, मुख्य अभियंता श्री. अशोक साळुंके, मुख्य अभियंता (अमरावती), श्री. राजेश नाईक, मुख्य अभियंता (अकोला), अधीक्षक अभियंता श्री. दिपक देवहाते,अधीक्षक अभियंता प्रविण दरोली,कार्यकारी अभियंता प्रफूल्ल लांडे, राजेश घाटोळे, प्रदिप अंधारे, यांची प्रमुख उपस्थिती होती.
“वीज ही केवळ अत्यावश्यकच नव्हे, तर जनतेच्या जीवनमानात सकारात्मक बदल घडवणारी शक्ती आहे. गुणवत्तापूर्ण आणि अखंडित वीजपुरवठा देण्यासाठी उपकेंद्रांची भूमिका अतिशय महत्त्वाची आहे. ISO 9001:2015 या आंतरराष्ट्रीय दर्जा मानकानुसार ३३ केव्ही लोणी (टाकळी) उपकेंद्रात राबवण्यात आलेल्या तांत्रिक व्यवस्थापन पद्धतीमुळे ग्राहकांना दर्जेदार सेवा मिळण्यास मदत होणार आहे. लोणी उपकेंद्राच्या प्रगतीत कर्मचाऱ्यांनी स्वयंस्फूर्तीने घेतलेल्या सहभागाचे त्यांनी विशेष उल्लेख करत परिमंडळातील “इतर अधिकारी व कर्मचाऱ्यांनीही नाविन्यपूर्ण दृष्टिकोन स्वीकारून आपल्या क्षेत्रातील उपकेंद्रांना ISO मानकाच्या धर्तीवर सुधारित करावे व ISO मानांकन मिळवण्यासाठी पुढाकार घ्यावा,” असे आवाहनही श्री. लोकेश चंद्र यांनी यावेळी केले.
