स्थानिक गुन्हे शाखा अमरावती ग्रामीणच्या पथकाची कार्यवाही
नांदगाव खंडेश्वर / तालुका प्रतिनिधी
नकली सोन्याच्या गिन्यांचे आमिष दाखवून जबरदस्तीने ३ लाख रुपये लंपास करणाऱ्या प्रकरणातील दोन फरार आरोपींना स्थानिक गुन्हे शाखा,अमरावती ग्रामीणच्या पथकाने अटक केली आहे.पोलिसांनी दिलेल्या माहितीनुसार, दिनांक १७/०६/२०२५ रोजी पदमीनी भरणे (वय ४५ वर्ष, रा. सारखनी, ता. किनवट, जि. नांदेड) यांना आरोपी दिपक पल्लाडे (रा. गोंडवडसा, ता. किनवट, जि. नांदेड) याने कमी पैशांमध्ये सोन्याच्या गिन्या देण्याचे आमिष दाखवून, नकली गिन्या दाखवून मारहाण केली. फिर्यादीकडून ३,००,०००/- रुपये जबरदस्तीने घेऊन आरोपी चारचाकी वाहनाने पसार झाले होते. या प्रकरणी पो.स्टे. नांदगाव खंडेश्वर येथे अप.क्र. १९०/२०२५, कलम ३१० (२) भादंवि अंतर्गत गुन्हा नोंद करण्यात आला होता.तपासादरम्यान स्थानिक गुन्हे शाखेच्या पो.उप.नि. मुलचंद भांबुरकर यांच्या पथकाने दि.१९/०६/२०२५ रोजी आरोपी
१) दिपक उर्फ अश्विन पल्हाडे,
२) शामराव आनंदराव राखडे,
३) सचिन विलास तोडसाम (सर्व रा. गोंडवडसा, ता. माहुर, जि. नांदेड) यांना ताब्यात घेतले.चौकशीत मुख्य आरोपी लक्ष्मण देवीदास जाधव (रा. कारंजा, जि. वाशिम) व त्याचा साथीदार कैलास भाउराव जाधव (रा. सावंगी, ता. दारव्हा, जि. यवतमाळ) असल्याचे निष्पन्न झाले.सदर आरोपी फरार असल्याने त्यांचा शोध सुरु होता. दरम्यान, दिनांक १७/०७/२०२५ रोजी गोपनीय माहितीच्या आधारे लक्ष्मण जाधव त्याच्या राहत्या घरी असल्याचे समजले. स्थानिक गुन्हे शाखेच्या पथकाने तत्काळ कारवाई करत त्याला ताब्यात घेतले. चौकशी दरम्यान त्याने गुन्ह्याची कबुली दिली. त्यानंतर त्याचा साथीदार कैलास जाधव यालाही अटक करण्यात आली. दोघांनाही पुढील कारवाईसाठी पो.स्टे. नांदगाव खंडेश्वर यांच्या ताब्यात देण्यात आले.ही यशस्वी कारवाई मा. पोलीस अधीक्षक श्री. विशाल आनंद, मा. अपर पोलीस अधीक्षक श्री. पंकज कुमावत (अमरावती ग्रामीण), व पो.नि. श्री. किरण वानखडे यांच्या मार्गदर्शनाखाली पो.उप.नि. मुलचंद भांबुरकर व त्यांचे सहकारी पो.अमंलदार अमोल देशमुख, मंगेश लकडे, सचिन मसांगे, दिनेश कनोजीया आणि चालक पो.कॉ. प्रज्वल राउत यांनी केली.
