महिलांसाठी स्वच्छता सुविधा व रस्त्यांच्या समस्येकडे नगरपालिकेचे लक्ष वेधले
अचलपूर/ फिरोज खान
अचलपूर शहरातील देवळी येथील सार्वजनिक शौचालय व रस्त्यांच्या अत्यंत दयनीय अवस्थेविरोधात रिपब्लिकन पार्टी ऑफ इंडिया (RPI) अचलपूर शहर शाखेतर्फे आंदोलनात्मक झाडलागवड करून निषेध नोंदविण्यात आला. या अनोख्या आंदोलनाचे नेतृत्व रिपाई शहराध्यक्ष किशोर मोहोड यांनी केले.या वेळी प्रमुख उपस्थितीत प्रल्हाद शेठ अग्रवाल, मुकेश अग्रवाल, राम खंडेलवाल, प्रफुल जुनघरे, लोकेश अग्रवाल, चेतन गुजराती, हार्दिक कशवाडिया, श्याम खंडेलवाल, सुनील लाड, कपिल शर्मा, भूपेश अग्रवाल, असलम खान, प्रणय जुनघरे, अर्शद जुनघरे आणि प्रमोद भेले यांचा सहभाग होता.
रिपाईतर्फे नगर परिषद अचलपूरच्या मुख्याधिकारी यांना सादर करण्यात आलेल्या निवेदनात असे नमूद करण्यात आले की,अचलपूर शहरातील गजजळटोळी वस्तीपासून देवळी चौक, देवी रोड परिसर हा गर्दीचा असून दररोज हजारो नागरिक, व्यापारी, विद्यार्थी व महिला या मार्गाने प्रवास करतात. परंतु या भागात स्वच्छतेचा व पायाभूत सुविधांचा पूर्ण अभाव आहे. रस्त्यांवर सर्वत्र खड्डे असून, सार्वजनिक शौचालयाची अवस्था अत्यंत वाईट आहे. महिलांसाठी सुरक्षित व स्वच्छ प्रसाधनगृह नसल्यामुळे मोठ्या प्रमाणात गैरसोय होत आहे.शहराध्यक्ष किशोर मोहोड यांनी सांगितले की, “महिला व नागरिकांना होणाऱ्या या त्रासाकडे नगरपालिका वारंवार दुर्लक्ष करत आहे. देवळी रोड व चौक परिसरात स्वच्छता, प्रकाशयोजना, रस्त्यांची दुरुस्ती आणि महिलांसाठी स्वतंत्र शौचालयाची तातडीने व्यवस्था करण्यात यावी. अन्यथा रिपाईतर्फे पुढील तीव्र आंदोलन करण्यात येईल.”या आंदोलनादरम्यान देवळी चौकात प्रतीकात्मकरीत्या “बेशरम झाड” लावण्यात आले. यामागचा अर्थ असा की, प्रशासनाच्या निष्क्रियतेचा निषेध म्हणून हे झाड ‘बेशरम वृत्तीच्या’ शासनव्यवस्थेला प्रतीक म्हणून लावण्यात आले आहे. नागरिकांनी या आंदोलनाचे स्वागत करत रिपाई कार्यकर्त्यांचे कौतुक केले.रिपब्लिकन पार्टी ऑफ इंडिया अचलपूर शाखेने पुढील काही दिवसांत नगरपालिकेला अंतिम इशारा देत, समस्यांचे निराकरण न झाल्यास मोठ्या आंदोलनाची घोषणा केली आहे.
