अंजनगाव सुर्जी / मनोहर मुरकुटे
समाजातील वंचित, शोषित घटकांच्या मुक्तीसाठी कार्यरत राहून महात्मा जोतिबा फुले, छत्रपती शाहू महाराज, छत्रपती शिवाजी महाराज, डॉ. बाबासाहेब आंबेडकर, संत तुकाराम महाराज, संत गाडगेबाबा, राजमाता जिजाऊ यांसह अनेक पुरोगामी संत-महापुरुषांच्या विचारांचा सातत्याने प्रचार व प्रसार करणारे शांत, सयमी व समर्पित व्यक्तिमत्त्व प्रा. प्रेमकुमार बोके यांची गोंडवाना विद्यापीठ, गडचिरोलीच्या ‘लोकराजा राजर्षी छत्रपती शाहू महाराज अध्ययन समिती’वर सदस्य म्हणून निवड झाली आहे.
पुरोगामी चळवळीतील मानाचे स्थान :
प्रा. बोके हे महाराष्ट्रातील सुप्रसिद्ध व्याख्याते, विचारवंत, नामवंत लेखक, प्रशिक्षक आणि संभाजी ब्रिगेडचे प्रदेश प्रवक्ते म्हणून ओळखले जातात. पुरोगामी चळवळीतील विचारांना त्यांनी व्याख्यानांद्वारे, लिखाणाद्वारे आणि प्रशिक्षण शिबिरांद्वारे सातत्याने दिशा दिली आहे. त्यांच्या विचारवंत, निर्भय व निष्पृह कार्यशैलीमुळे महाराष्ट्रातील युवकांमध्ये जागरूकता निर्माण झाली आहे.
निवडीबद्दल अभिनंदनाचा वर्षाव :
गोंडवाना विद्यापीठाच्या या महत्वाच्या समितीवर प्रा. बोके यांची झालेली निवड ही पुरोगामी चळवळीतील कार्यकर्त्यांसाठी अभिमानास्पद बाब मानली जात आहे. या निवडीबद्दल महाराष्ट्रभरातून सर्वच स्तरातून अभिनंदनाचा वर्षाव होत आहे. सामाजिक, शैक्षणिक व सांस्कृतिक क्षेत्रातील मान्यवर व्यक्तींनी त्यांना शुभेच्छा दिल्या आहेत.या निवडीबद्दल प्रतिक्रिया देताना गोंडवाना विद्यापीठाचे सिनेट सदस्य व पुरोगामी चळवळीतील प्रख्यात व्यक्तिमत्त्व मा. दीपक धोपटे, सिनेट सदस्य प्रा. डॉ. दिलीप चौधरी तसेच सर्व स्नेहीजनांचे त्यांनी आभार मानले. “ही निवड माझ्यासाठी जबाबदारीचे पद आहे. शाहू महाराजांच्या कार्याचा वसा घेऊन सामाजिक न्याय आणि समानतेच्या चळवळीला विद्यापीठ स्तरावर अधिक व्यापकपणे पोहोचवण्याचा प्रयत्न करणार आहे,” असे प्रा. बोके यांनी सांगितले.
