भाजपमध्ये मोठ्या प्रमाणात बंडखोरी,
काँग्रेसचे अक्षय पारसकर यांचा भाजपात प्रवेश.
नांदगाव खंडेश्वर/ उत्तम ब्राम्हणवाडे
नांदगाव खंडेश्वर नगर पंचायत निवडणूकीत आज अर्ज दाखल करण्याच्या शेवटच्या दिवशी प्रचंड उलथापालथ झाली असून भाजपमध्ये मोठ्या प्रमाणात बंडखोरी झाल्याचे दिसून आले. त्याच प्रमाणे नांदगाव खंडेश्वर येथील काँग्रेसचे दिग्गज नेते आणि माजी नगराध्यक्ष अक्षय पारसकर यांनी अर्ज दाखल करण्याच्या शेवटच्या क्षणी आपल्या समर्थकांसह भाजपमध्ये प्रवेश करून सर्वांना आश्चर्याचा धक्का दिला.
नांदगाव खंडेश्वर नगर पंचायतीच्या निवडणुकीत आज सर्वच पक्षांनी आपल्या उमेदवारांचे अर्ज दाखल केले.या निवडणुकीत भारतीय जनता पक्ष आणि काँग्रेस पार्टी यांचेसह मार्क्सवादी कम्युनिस्ट पक्ष यांनी आपले कुणाशीही युती न करता नगराध्यक्ष पदाच्या उमेदवारासह 17 ही नगरसेवकांचे उमेदवारी अर्ज दाखल केले.तर शिवसेना (उबाठा) आणि राष्ट्रवादी काँग्रेस (शरद पवार) यांची युती झाली, तसेच राष्ट्रवादी काँग्रेस (अजित पवार) आणि शिवसेना (शिंदे गट) यांची युती झाल्याचे सांगण्यात आले. या पक्षांनी सुद्धा आज नगराध्यक्ष पदासह सर्व १७ नगरसेवक पदांसाठी उमेदवारि दाखल केली. त्याच प्रमाणे वंचित बहुजन आघाडी, प्रहार जनशक्ती पक्ष आणि युवा स्वाभिमान पक्ष यांनी फक्त नगरसेवक पदांसाठी काही ठिकाणी उमेदवार उभे केले आहेत.
नांदगाव खंडेश्वर शहरात एकूण १७ प्रभाग आहेत. आज रोजी भाजपाच्या बंडखोर सुरेखा शिंदे यांनी अपक्ष उमेदवारी दाखल केला आहे. तसेच भाजपाच्या दुसऱ्या बंडखोर कल्पना मारोटकर यांनी राष्ट्रवादी काँग्रेस (अजित पवार) – शिवसेना (शिंदे गट) युतीकडून उमेदवारी दाखल केला. तसेच भाजपाचे विशाल गुल्हाने यांनी सुद्धा बंडखोरी करीत नगरसेवक पदाकरीता आपली उमेदवारी अपक्ष म्हणून प्रभाग १७ मधून उमेदवारी दाखल केली.
प्रहार जनशक्ती पक्षाने प्रभाग १,२ आणि ३ मधून उमेदवारी दाखल केली आहे. ऐन वेळेवर माजी नगराध्यक्ष अक्षय पारसकर यांनी काँग्रेस मधून बंडखोरी करून भाजपा कडून उमेदवारी दाखल केली.नांदगाव खंडेश्वर शहरात एकूण १२,०३९ मतदार आहेत. आज उमेदवारी अर्ज दाखल करण्याच्या शेवटच्या दिवशी एकूण ९८ उमेदवारांनी आपल्या उमेदवारी अर्ज दाखल केले आहेत,त्यामध्ये नगराध्यक्ष पदासाठी ११ जणांनी आणि नगरसेवक पदासाठी ८७ जणांनी तहसील कार्यालयात अर्ज दाखल केले असल्याची माहिती निवडणूक निर्णय अधिकारी यांनी दिली.
अर्ज दाखल प्रक्रियेदरम्यान निवडणूक निर्णय अधिकारी तथा तहसीलदार अश्विनी जाधव,नगर पंचायतीचे प्रशासक निवृत्ती भालकर, आणि सर्व कर्मचारी तसेच ठाणेदार श्रीराम लांबडे व पोलीस कर्मचारी उपस्थित होते.
एकूण पाहता नांदगाव खंडेश्वर नगर पंचायतीच्या निवडणुकीसाठी अर्ज दाखल करण्याचा शेवटचा दिवस हा प्रचंड उलथापालथीचा ठरला. आज भाजपाच्या सौ स्वाती राजेश पाठक,काँग्रेसच्या सौ विना निशांत जाधव, राष्ट्रवादी काँग्रेस अजित पवार गटाच्या सौ कल्पना अमोल मारोटकर, शिवसेना उभाठाच्या सौ प्राप्ती विलास मारोटकर, तसेच मार्क्सवादी कम्युनिस्ट पक्षाच्या सौ आसमा परवीन यांचे सह सर्वच पक्षाच्या उमेदवारांनी आपली उमेदवारी दाखल केली.
