एका महिलेसह दोन तरुणी गंभीर जखमी, गंभीर जखमी उपचारासाठी अमरावती येथे रवाना
मोर्शी /तालुका प्रतिनिधी
मोर्शी ते शिभोरा रोडवरील असलेल्या नशीदपूर गावाच्या फाट्याजवळ मोटरसायकल व स्कुटीच्या आमने-सामने झालेल्या धडकेत एका (23)वर्षीय युवकाचा घटनास्थळी मृत्यू झाला असून सदरच्या अपघातात एका गर्भवती महिलेसह दोन युवतींना गंभीर अवस्थेत अमरावती येथे खाजगी रुग्णालयात हलविण्यात आले आहे.सदर घटना रविवार दि.6 जून रोजी सायंकाळी 6 वाजताच्या दरम्यान घडली होती.
अपघातात मृत झालेल्या युवकाचे नाव नकुल राजेश नवले वय 23वर्ष रा.अंतोरा तालुका आष्टी जिल्हा वर्धा असे आहे.
याबाबत मिळालेल्या माहितीनुसार करिष्मा भीमराव रामटेके वय 32 वर्ष रा. वरुड,महिमा प्रदीप भोकरे वय 25 वर्ष रा. अमरावती व दिपाली हरिदास पाटील वय 23 वर्ष रा.ब्राह्मणवाडा (भगत)यातील एक महिला सह दोन तरुणी मोर्शी येथील इसाफ बँक कार्यरत असून या तिघी मैत्रिणी आषाढी एकादशी व रविवार सुट्टीचा दिवस असल्यामुळे त्या आपली स्कुटी क्र.एम. एच.27 डी यु ६५०९ ने नळ दमयंती जलाशय पाहण्यासाठी गेल्या होत्या. धरण पाहून येत असतांना नकुल राजेश नवले वय 23 वर्ष रा.अंतोरा हा आपली दुचाकी मोटर सायकल क्र.एम एच 27 एपी 2765 ने अंतोरा येथे जात असतांना या दोन्ही दुचाकी वाहनांची समोरा समोर जबर धडक बसली.या अपघातात नकुल नवले याचा घटनास्थळी मृत्यू झाला. घटनेची माहिती पोलिसांना मिळताच जखमींना इरफानभाई यांच्या रुग्णवाहिकेतून उपजिल्हा रुग्णालय आणण्यात आले. उपजिल्हा रुग्णालयाच्या वैद्यकीय अधिकाऱ्यांनी सर्व जखमींवर औषधोपचार केल्यानंतर एका महिलेसह दोन तरुणीला अतिशय गंभीर मार बसल्यामुळे त्यांना पुढील उपचारासाठी अमरावती येथे रवाना करण्यात आले.पुढील तपास पोलीस करीत आहे.
