नांदगाव खंडेश्वर शहरात आले हिरवेगार सीताफळ

फळप्रेमींना घालतेय भुरळ

आवक वाढली तरी दर अद्याप जास्तच

 नांदगाव खंडेश्वर / उत्तम ब्राम्हणवाडे 

प्रत्येक फळाला एक हंगाम असतो. त्याचकाळात ती उपलब्ध होत असतात अन् त्यावेळी त्यांचे सेवन करणे आरोग्यासाठीही पोषक असते.गणेशोत्सव सुरू झाला की बाजारात विविध प्रकारच्या फळांची आवक वाढते.सध्या सफरचंद व सीताफळांचा हंगाम असून दोन्ही फळांची आवक वाढली आहे. त्यात रस्त्याकडेला बसून विकण्यात येत असलेली सीताफळे सर्वांचे लक्ष वेधून घेत आहेत.आवक वाढली असली तरी दर अद्यापही थोडे महागच आहेत.नांदगाव खंडेश्वर शहरात रस्त्याच्या कडेला सीताफळ विक्रेत्यांची गर्दी दिसून येत आहे. ग्रामीण भागातील महिला व पुरुष सीताफळे विकत आहेत. गेल्या काही दिवसांपासून सीताफळांची उत्पादन व आवक वाढल्याने विक्रेतेही वाढले आहेत. सध्या सीताफळाचा भाव आकारानुसार प्रति किलो १०० ते १२० रुपये आहे. रस्त्यावरून ये-जा करणारे वाहनचालक व प्रवासी थांबून सीताफळे विकत घेत असल्याचे दिसत आहे. थेटशेतातील ताजी फळे मिळत असल्याने सध्या सीताफळांना मागणीही वाढली आहे. आबालवृद्धांचे आवडते फळ म्हणून प्रसिद्ध असलेल्या सीताफळांचा हंगाम सप्टेंबर ते नोव्हेंबरपर्यंत असतो.अमरावती जिल्ह्यातील परतवाडा येथे उत्पादन मोठ्या प्रमाणावर होते. या परिसरात सीताफळांच्या मोठ्या बागा आहेत. तेथील स्थानिक शेतकरी स्वतःच्या शेतातील सीताफळे विक्रीसाठी आणत आहेत. तर बहुतांश विक्रेते बागमालकांकडून सीताफळांची खरेदी करून नांदगाव खंडेश्वरच्या परिसरात विकत आहेत. या व्यवसायातून अनेकांना रोजगार मिळाला आहे. रोज सकाळी गावातून दुचाकी वा बसमधून सीताफळे आणून ती दिवसभर विकली जात आहेत.

            नांदगाव खंडेश्वर परिसरात विविध ठिकाणी सीताफळांची लागवड केली जात आहे. गेली अनेक वर्षे माझ्यासह गावातील बहुतांश लोक सीताफळ विक्रीच्या व्यवसायात आहेत. यंदा पीक चांगले आले असून सध्या तोडणी सुरु आहे. येत्या काळात आवक आणखी वाढणार आहे. 

 – मो. शाकीर मो.शफी.

फळविक्रेता,नांदगाव खंडेश्वर 

 नांदगाव खंडेश्वर शहरालगत माझ्या चार पैकी दोन एक्कर शेतात सीताफळाच्या दोन हजार झाडाची लागवड मी केली असून दरवर्षी चांगल्या प्रमाणात लाखो रुपयांचे उत्पादन होत आहे. सीताफळाची विक्री शेतातून व मार्केटमध्ये केल्या जाते.

   – मिलिंद मोरे

सीताफळ उत्पादक शेतकरी, नांदगाव खंडेश्वर