श्रीक्षेत्र माहूरगड / संजय घोगरे
साडेतिन शक्तीपीठांपैकी एक असलेल्या माहूरगडावर नवरात्र महोत्सव उत्साहात सुरू असून आज सहाव्या माळेला मुसळधार पावसाच्या साक्षीने घटास सहावी माळ अर्पण करण्यात आली. आई श्री रेणुका मातेस मोती पांढऱ्या रंगाचे महावस्त्र चढवण्यात आले. त्यासोबतच पुरातन अलंकार, फुलांची आरास, पायास नैवेद्य, विडा-तांबूल अर्पण करून महाआरती संपन्न झाली. यावेळी श्री रेणुकादेवी संस्थानचे पुजारी मंडळ उपस्थित होते.श्री आज श्री रेणुका मातेवरच्या गडावर भर पावसामध्ये रसिक कलाकारांनी सुद्धा सेवा अर्पण केली.आज शनिवार असल्यामुळे मोठ्या प्रमाणावर गर्दी होण्याची अपेक्षा होती. मात्र सतत कोसळणाऱ्या पावसामुळे भाविकांच्या उपस्थितीत काही प्रमाणात घट झाली.
तरीही दुपारनंतर हळूहळू भाविकांनी गडावर उपस्थिती लावली व दर्शनाचा लाभ घेतला.दरम्यान, भाविकांसाठी एसटी महामंडळाने दाखवलेली तत्पर सेवा कौतुकास्पद ठरली. सलग एकापाठोपाठ एक अशा एसटी बसेस उपलब्ध करून देण्यात आल्याने भाविकांना प्रवासात कोणताही त्रास जाणवला नाही. त्यामुळे भाविकांनी महामंडळाच्या सेवेला दाद देत समाधान व्यक्त केले.नवरात्र महोत्सवाच्या पार्श्वभूमीवर पावसाचा अडथळा असला तरी भक्तिभावाने सजलेला गड आणि शिस्तबद्ध वाहतूक व्यवस्थेमुळे भाविकांना सुखद अनुभव मिळाला.
