नगराध्यपदासाठी दावेदारांची रांग : आता मोर्चेबांधणीला वेग.
नांदगाव खंडेश्वर/उत्तम ब्राम्हणवाडे
नांदगाव खंडेश्वर नगरपंचायतीच्या आगामी निवडणुकीसाठी प्रभागानुसार आरक्षणाची सोडत काढण्यात आली. त्यात ज्या ठिकाणी सर्वसाधारण लोकांची नगरसेवक म्हणून लढण्याची इच्छा होती तो प्रभाग आरक्षित झाल्याने अनेक इच्छुकांचा हिरमोड झाला असून आता त्यांच्यावर सुरक्षित प्रभाग शोधण्याची वेळ आली आहे. तर दुसरीकडे नगराध्यक्ष पद सर्वसाधारण असल्याने या पदावर दावेदारी करणाऱ्यांची संख्या वाढली आहे.प्रभागनिहाय आरक्षणाची सोडत जाहीर झाल्याने ज्या ठिकाणी पुरुष इच्छुक होते त्या ठिकाणी महिला आरक्षण निघाले आहेत. ज्या ठिकाणी सर्वसामान्य इच्छुक होते त्या ठिकाणी एसटी किंवा एससीसाठी आरक्षण जाहीर झाले आहेत. तर ज्या ठिकाणी ओबीसी दावेदार जास्त होते त्या ठिकाणी एससी आणि एसटी आरक्षण आल्यामुळे अनेकांचा हिरमोड झाला आहे.
ज्या ठिकाणी महिला लढण्यास इच्छुक होते त्या ठिकाणी सर्वसाधारण आल्यामुळे महिलांपेक्षा पुरुषांची दावेदारी असणार आहे. दुसरीकडे नगराध्यक्ष पद आधी महिला सर्वसाधारण होते. आता सर्वसाधारण झाल्यामुळे आधी ज्या महिला जोरपणे दावेदारी करीत होत्या त्या ठिकाणी त्यांचे पती नगराध्यक्षपदावर दावा करीत आहे. त्यामुळे त्या महिलांचे नगराध्यक्ष होण्याचे स्वप्न धूसर झाले आहे. आरक्षण सोडतीनंतर निवडणुकीचे जवळपास चित्र स्पष्ट झाले आहे. त्यामुळे आता इच्छुकांच्या मोर्चेबांधणीला वेग आला असून सर्वच राजकीय पक्ष कामाला लागले आहेत.
दावेदार अनेक उमेदवारीची माळ कुणाच्या गळ्यात
नगराध्यक्ष आणि प्रभागांचे आरक्षण जाहीर झाल्यानंतर निवडणुकीचे चित्र जवळपास स्पष्ट झाले आहे. निवडणूक लढण्यासाठी अनेक इच्छुक असल्याने उमेदवारीची माळ कोणाच्या गळ्यात पडेल हे सध्या सांगता येत नाही. अशात इच्छुकांनी पक्षश्रेष्ठीकडे प्रत्यक्ष अप्रत्यक्षपणे आपली बाजू मांडण्यासाठी प्रयत्न चालविले आहेत.पक्षश्रेष्ठींचीसुद्धा उमेदवारी देताना मोठी दमछाक होण्याची शक्यता आहे.
