मालखेड येथील रेल्वे अंडरपास मध्ये पावसाचे पाणीच पाणी
चांदुर रेल्वे /तालुका प्रतिनिधी
धामणगाव रेल्वे विधानसभा मतदार संघाचे माजी आमदार विरेंद्र जगताप आणि अमरावती लोकसभा मतदार संघाचे खासदार बळवंत वानखडे यांनी मालखेड येथील रेल्वे अंडरपासची पाहणी केली. या अंडरपासमध्ये पावसाळ्यात मोठ्या प्रमाणात पाणी साचत असल्याने स्थानिक शेतकरी आणि शेतमजुरांना प्रचंड त्रास सहन करावा लागत आहे. हा अंडरपास गावातील शेतकरी आणि मजूर मोठ्या संख्येने वापरतात,परंतु पाणी साचल्यामुळे त्यांच्या दैनंदिन कामकाजावर परिणाम होत आहे.पाहणी दरम्यान, दोन्ही नेत्यांनी स्थानिकांच्या समस्या जाणून घेतल्या आणि अंडरपासमधील अपुऱ्या ड्रेनेज व्यवस्थेमुळे निर्माण झालेल्या अडचणींची दखल घेतली. त्यांनी या समस्येचे त्वरित निराकरण करण्याच्या गरजेवर भर दिला,जेणेकरून गावकऱ्यांना सुरळीत ये-जा करता येईल.माजी आमदार विरेंद्र जगताप आणि खासदार बळवंत वानखडे यांनी रेल्वे विभागाच्या संबंधित अधिकाऱ्यांना तात्काळ उपाययोजना करण्याचे निर्देश दिले. त्यांनी अधिकाऱ्यांना प्रभावी ड्रेनेज सोल्युशन्स लागू करण्याचे आणि अंडरपास वर्षभर वापरता येईल याची खात्री करण्याचे आदेश दिले. रेल्वे विभागाने लवकरच आवश्यक पावले उचलून ही समस्या सोडवण्याचे आश्वासन दिले आहे. नेत्यांनी रेल्वे अधिकाऱ्यांच्या सहकार्याने ही समस्या लवकरच सुटेल आणि स्थानिकांना दिलासा मिळेल असा विश्वास व्यक्त केला.
