‘काळी दिवाळी आंदोलन’ आक्रमक पद्धतीने पार पडले; शासनाविरोधात घोषणांचा गजर
चांदुर रेल्वे/ तालुका प्रतिनिधी
अतिवृष्टीमुळे शेतकऱ्यांची पिके उद्ध्वस्त झाली असून, शेतकऱ्यांच्या डोळ्यांसमोर संपूर्ण हंगामाची मेहनत पाण्यात वाहून गेली आहे. मात्र शासनाकडून केवळ घोषणा आणि फोटोसेशनपुरतीच मदत मिळत असल्याने शेतकऱ्यांचा संताप उसळला आहे.या अन्यायकारक परिस्थितीविरोधात माजी आमदार मा. वीरेंद्र भाऊ जगताप यांच्या नेतृत्वाखाली आज चांदुर रेल्वे येथे भव्य आणि आक्रमक ‘काळी दिवाळी आंदोलन’ पार पडले.
काळ्या फिती, काळे झेंडे आणि काळी दिवाळी!
एस.डी.ओ. कार्यालयासमोर हजारो शेतकरी, महिला, युवक आणि काँग्रेस कार्यकर्त्यांचा प्रचंड जनसागर उसळला होता. सर्व शेतकऱ्यांनी काळ्या फिती बांधल्या, काळे झेंडे हातात घेतले आणि शासनाविरोधात तीव्र घोषणाबाजी केली.
शेतकऱ्यांनी आपल्या घरातून भाकर, ठेचा आणि बेसन आणून प्रतीकात्मक ‘काळी दिवाळी’ साजरी केली.
“५० हजार हेक्टरी मदत द्या!”, “शेतकऱ्यांचा अपमान सहन करणार नाही!”, “घोषणा नव्हे, ठोस निर्णय हवा!” अशा घोषणांनी परिसर दणाणून गेला.
जगताप यांची सरकारवर झोडप – “₹८,५०० ही शेतकऱ्यांची थट्टा!”
माजी आमदार वीरेंद्र जगताप म्हणाले, “फडणवीस सरकारने जाहीर केलेली ₹८,५०० प्रति हेक्टर मदत ही शेतकऱ्यांच्या जखमेवर मीठ चोळण्यासारखी आहे. हे शेतकऱ्यांवर अन्याय आहे. शासनाने तात्काळ मदतीचा दर ₹५०,००० प्रति हेक्टर करावा, अन्यथा आम्ही शेतकऱ्यांच्या हक्कासाठी आणखी मोठा लढा उभारू.” ते पुढे म्हणाले, “शेतकरी हा देशाचा अन्नदाता आहे. त्याच्या डोळ्यांत पाणी आणणारे सरकार जनतेच्या मनात स्थान मिळवू शकत नाही. जोपर्यंत प्रत्येक शेतकऱ्याला न्याय मिळत नाही, तोपर्यंत आमचा लढा सुरूच राहील.
.“फोटोसेशन नव्हे, ठोस मदत द्या; अन्यथा रस्त्यावर उतरू!”
या आंदोलनात मोठ्या संख्येने शेतकरी, महिला आणि युवकांनी सहभाग घेतला. चांदुर रेल्वे परिसर घोषणांनी दुमदुमला, तर प्रशासनावर शेतकऱ्यांच्या मागण्यांकडे गांभीर्याने लक्ष देण्याचा दबाव निर्माण झाला आहे.या आंदोलनात हजारो शेतकऱ्यांनी उपस्थिती लावली होती.
