रेशन तांदळाचा वाढता काळाबाजार
हॉटेल्ससह परराज्यातून मागणी भेसळीसाठीही वापर
नांदगाव खंडेश्वर/ उत्तम ब्राम्हणवाडे
गरजू व गरिबांना अन्न देण्यासाठी राबविण्यात येत असलेली गरीब कल्याण अन्न योजना काळा बाजार करणाऱ्यांसाठी वरदान ठरली आहे. योजनेतील तांदूळ तस्करांच्या हाती पडत आहे. नांदगाव खंडेश्वर तालुक्यातील बहुसंख्य गावांमध्ये बेकायदेशीरपणे तांदूळ जमा करून मोठ्या व्यावसायिकांना विकला जात आहे. त्यामुळे गरिबांच्या तांदळावर धनदांडगे पैसे कमावू लागले आहेत.तालुक्यातील दारिद्र्यरेषेखालील (बीपीएल) कुटुंबांना तांदूळ वाटप होते. कुटुंबातील प्रत्येक व्यक्तीला दरमाह पाच किलो तांदूळ दिले जात आहेत.मात्र या तांदळाची काळ्या बाजारात विक्री करण्याचा व्यवसाय मोठ्या प्रमाणात सुरू आहे.तरीदेखील त्याचीही विक्री मोठ्या प्रमाणात होत आहे.मात्र, नागरिकांकडून हा तांदूळ व्यापारी खरेदी करत आहेत.शिवाय काही लोक रेशन तांदूळ न वापरता थेट विक्री करत आहेत.हा तांदूळ मोठे व्यापारी खरेदी करून महाराष्ट्रासह विविध राज्यांना पुरवत असल्याचीही शक्यता नाकारता येत नाही.आजही मोठ्या प्रमाणात शहरासह जिल्ह्यात रेशनच्या तांदळाचा काळाबाजार सुरू असल्याचे दिसून येत आहे.
रोज मोठ्या प्रमाणावर खरेदी
रेशन तांदूळ संकलनासाठी व्यापारी ऑटो रिक्षा व मालवाहू वाहने घेऊन गावागावांत फिरत आहेत. तांदळाची खरेदी १५ ते २० रुपये प्रति किलोने केली जात आहे. अशाप्रकारे दररोज वेगवेगळ्या ठिकाणी टनभर तांदूळ जमा होत आहे. लोक तांदूळ खरेदी केल्यानंतर लगेच पैसे देत आहेत.
पॉलिश करून भेसळ
लोकांकडून कमी दराने तांदूळ विकत घेतल्यानंतर काही ठिकाणी राईस मिलमध्ये त्याला पॉलिश केले जात आहे. त्यानंतर उच्च दर्जाच्या तांदळामध्ये ते तांदूळ मिसळले जात आहेत. व्यावसायिक उच्च प्रतीचे व इतर जातीचे तांदूळ म्हणून त्याची जादा दराने विक्री करत आहेत. काही राईस मिल चालकांचा व भात व्यावसायिकांचा याच्यात हात असल्याचा दाट संशय आहे.
इडली, डोसासाठीही मागणी
रेशनचा तांदूळ विक्रीनंतर लगेचच हॉटेल्सना पुरविला जात आहे. काही हॉटेल मालक इडली व डोसा करण्यासाठी हा तांदूळ लोकांना २० ते २५ रुपये प्रति किलो दराने विकत आहेत.
काळाबाजार सुरूच कार्यवाही शून्य
पोलिस प्रशासनासह पुरवठा विभागाने शहरासह तालुक्यात विविध ठिकाणी रेशनिंगचा काळाबाजार करणाऱ्यांवर कारवाईचा करायला पाहिजे. परंतु पाहिजे तशी कारवाई होत नसल्याने तांदळाचा काळाबाजार काही थांबलेला दिसत नाही.
नांदगाव खंडेश्वर तालुक्यात रेशनचा काळाबाजार करणाऱ्या विरुद्ध अनेक वेळा कारवाई करण्यात आल्या असून याबाबत तक्रार प्राप्त झाल्यास अथवा रेशनिंगचा काळाबाजार करताना दिसून आल्यास पुरवठा विभागामार्फत कारवाई करण्यात येईल.
शितल राठोड,पुरवठा निरीक्षक, नांदगाव खंडेश्वर
