भाकप – किसान सभेचे धरणे आंदोलन .
नांदगांव खंडेश्वर /तालुका प्रतिनिधी
संपूर्ण राज्यात ऑगस्ट सप्टेंबर मध्ये झालेल्या अतिवृष्टी व सततच्या पावसामुळे शेतीचे प्रचंड नुकसान झाले आहे . नांदगांव खंडेश्वर तालुक्यात सुद्धा पिकांचे प्रचंड नुकसान आहे . तालुक्यातील शेतकऱ्यांचे मुख्य पिक असलेले सोयाबिन / कापूस / तूर व भाजीपाला पिकांचे मोठ्या प्रमाणात या सततच्या पावसामुळे नुकसान झाले आहे . सततचा पाऊस व अतिवृष्टीमुळे सोयाबीनला अत्यल्प शेंगा लागल्या . कापूस पिकाची सुद्धा तीच अवस्था आहे . शासनाने जाहीर केलेली हेक्टरी १८५०० रुपयाची मदत तोकडी आहे कारण शेतीचा लागत खर्च प्रचंड वाढलेला आहे . संपूर्ण खरीप हंगाम शेतकऱ्यांच्या हातुन गेलेला आहे . जाहीर केलेल्या मदती पैकी प्रत्यक्षात शेतकऱ्यांच्या हाती अत्यंत तुटपुंजी रक्कम पडते हा सरकार बाबत शेतकऱ्यांचा अनुभव आहे . तेव्हा तालुक्यातील शेतकऱ्यांना सरसकट हेक्टरी ७० हजार रुपये नुकसान भरपाई द्यावी .सरकारने पिक विम्याच्या संरचनेत विमा कंपन्यांच्या हितासाठी बदल करून शेतकऱ्यांचा विश्वासघात केला आहे.
उंबरठा उत्पन्नाच्या बाबतीत विमा कंपन्यांनी या पूर्वी शेतकऱ्यांची घोर फसवणूक केली आहे म्हणून उंबरठा उत्पन्नाची अट न ठेवता पिक विमा काढलेल्या शेतकऱ्यांना १००% पिक विमा भरपाई दया .. शेतकरी संकटात असल्यामुळे निवडनुक काळात संपूर्ण कर्जमाफिचे भाजपने दिलेले वचन पूर्ण करण्याची हिच योग्य वेळ असल्यामुळे शेतकऱ्यांची संपूर्ण कर्ज माफी करा . या मागण्यांना घेवून भारतीय कम्युनिस्ट पक्ष – किसान सभेने संपूर्ण राज्यभर आज (९ ऑक्टोबर ) आंदोलनाची हाक दिली होती .नांदगांव खंडेश्वर येथे भाकप -किसान सभेच्या कार्यकर्त्यांनी तहसिल समोर धरणे आंदोलन केले . सततच्या पावसामुळे तालुक्यात संपूर्ण खरीप हंगाम अडचणीत आला आहे . अगोदरच शेती निविष्ठाच्या वाढलेल्या प्रचंड भावामूळे शेतकऱ्यांचा शेती लागत खर्च प्रचंड वाढलेला आहे . आता या अस्मानी संकटामुळे त्याच्या आर्थिक विवंचनेत वाढ झाली आहे . अशा बिकट समयी सरकारने शेतकऱ्यांच्या पाठीशी उभे राहणे अपेक्षित असताना देवेंद्र फडणवीस सरकार मात्र मदतीच्या वलग्ना करण्यात गुंग आहे . महाराष्ट्रा सारखीच स्थिती असलेल्या कर्नाटक, पंजाब सरकारने तेथील शेतकऱ्यांना मोठ्या प्रमाणात आर्थिक मदत केली आहे . महाराष्ट्र सरकार मात्र शेतकऱ्यांचा अंत पाहत आहे . सततच्या पावसामुळे रोजगार गमावलेला शेतमजुर सुद्धा आर्थिक संकटात असल्यामुळे शेतमजुरांना प्रती कुटूंब २० हजार रुपये अनुदान देण्याची मागणी राज्यातील मोठा जन विभाग असलेल्या मजुरांची आहे . भांडवलदारांना पैशाची खैरात वाटणारे सरकार शेतकरी कष्टकऱ्यासाठी त्यांच्या हक्काचे पैसे नाकारत असल्याचे या वेळी बोलतांना किसान सभेचे राज्य कौंसिल सदस्य सुनिल मेटकर यांनी सांगितले . यावेळी नांदगांव खंडेश्वर तालुक्यात ओला दुष्काळ जाहीर करा . तालुक्यातील शेतकऱ्यांना सरसकट हेक्टरी ७० हजार रुपये मदत जाहीर करा . पिक विमा काढलेल्या शेतकऱ्यांना १००% पिक विमा भरपाई दया .शेतकऱ्यांची संपूर्ण कर्जमाफी करा . विद्यार्थ्यांचे संपूर्ण शैक्षणिक शुल्क माफ करा .शेतमजूरांना प्रती कुटूंब २० हजार रुपये अनुदान दया . नाफेड / पणन मार्फत सोयाबिन खरेदी यंत्रणा कार्यान्वित करा . नांदगांव खंडेश्वर येथे सिसिआय चे कापूस खरेदी केंद्र सुरू करा इत्यादी मागण्यांचे निवेदन तहसिलदार नांदगाव खंडेश्वर यांचे मार्फत मुख्यमंत्री देवेंद्र फडणवीस यांना पाठविण्यात आले . धरणे आंदोलनात संतोष सुरजुसे , विनोद तरेकर , हरिदास राजगिरे ,नारायणराव भगवे, लिलेश्वर आगळे , इस्राईल शहा , माधव ढोके , वासुदेव चौधरी , विनोद वैदय , प्रज्वल ढोके , उमेश मंदुरकर, लक्ष्मण भगेवार , अमोल राजकुळे , देवेंद्र कंठाळे , शामराव तायडे, देविदास ठाकरे , कल्पनाताई शुक्ला , हरिदास देशमुख, अविनाश कणसे ,संतोष बागडे , सदाशीव मेहेंगे ,निपुल भगवे ,पुंडलिक मेटकर ,समशेर खाँ पठाण, हरिभाऊ जेठे , जयराज लोणारे , फकिरा शेंडे ,हनुमान शिंदे , निखिल भोयर , श्रीकृष्ण वैदय सह अनेकांची उपस्थिती होती .
