शासनाच्या धोरणाचा फटका,शेतकऱ्यांना हमी भाव केव्हा मिळणार
नांदगाव खंडेश्वर/उत्तम ब्राम्हणवाडे
यावर्षी सततचा पाऊस आणि अतिवृष्टीमुळे शेतकऱ्यांची धावपळ उडत आहे. सोयाबीन आणि कापूस ही दोन्ही नगदी पिके शेतकऱ्यांच्या हातून गेली. त्यात भाव नाही.मात्र, व्यापारी कमी भाव देत असूनही शेतकऱ्यांना त्यांच्या दारात जावे लागत आहे.
शासनाच्या उदासीन धोरणामुळे शेतकरी गारद झाला आहे. शासनाने अद्याप हमीभावाने खरेदी सुरू न केल्यामुळे शेतकत्यांना आपला आर्थिक खर्च भागविण्यासाठी व्यापाऱ्यांचे उंबरठे झिजवावे लागत आहेत. यावर्षी मृग नक्षत्रात पिकांची लागवड केली. सुरुवातीला पिकांची स्थिती चांगली होती. त्यामुळे उत्पन्न चांगले होईल, या आशेवर शेतकरी होता. शेतकऱ्यांनी शेतात कबाड कष्ट करून पिकांची देखरेख केली. वेळोवेळी फवारणी, निंदण, खत दिले. मात्र, जुलै महिन्यापासून सुरू झालेल्या पावसाने शेतकऱ्यांच्या स्वप्नांचा पार चुराडा केला.
शेतकऱ्यांची दिवाळीही गेली अंधारात
कापूस व सोयाबीन हे नगदी पीक म्हणून घेतले जाते. हे पीक दिवाळीच्या आधीच निघत असल्यामुळे शेतकऱ्यांना याचा दिवाळीसाठी आर्थिक आधार होतो. मात्र, यावर्षी सततचा पाऊस व अतिवृष्टीमुळे या पिकांचे मोठ्या प्रमाणात नुकसान झाले. पावसामुळे सोयाबीनचे पीक पिवळे पडले व जागीच सडून गेले. त्यामुळे अनेक शेतकऱ्यांनी आपल्या शेतातील सोयाबीन काढलेच नाही. काहींनी तर शेतातच सोयाबीनच्या गंजा पेटवून दिल्या. त्यामुळे शेतकऱ्यांचे मोठे आर्थिक नुकसान झाले. ऐन दिवाळीच्या तोंडावर हे पीक हातून गेल्यामुळे शेतकऱ्यांची यावर्षीची दिवाळी अंधारातच गेली.
शासनाचे उदासीन धोरण; शेतकरी अडचणीत
यावर्षीच्या कापूस व सोयाबीनचे मोठ्या प्रमाणात नुकसान झाले. त्यातच पावसामुळे सोयाबीन पिवळे पडले. कापसावर लाल्यासारख्या रोगाचा प्रादुर्भाव झाल्यामुळे उत्पन्नात कमालीची घट झाली आहे. शासनाने कापूस व सोयबीनला हमीभाव जाहीर केला. मात्र, सीसीआयकडून अजूनही कापसाची खरेदी सुरू झाली नाही. परिणामी बळीराजा व्यापऱ्यांच्या दारात जात आहे. ‘शासनाचे धोरण अन शेतकऱ्यांचे मरण’ याप्रमाणे शेतकऱ्यांचे हाल होताना दिसत आहेत.
वेचणीपूर्वीच करावा लागला कापसाचा सौदा
दरवर्षी दसऱ्याला सीतादई करून दिवाळीपूर्वी कापसाचा पहिला वेचा विकायचा अन दिवाळी साजरी करायची, हा शेतकऱ्यांचा शिरस्ता. पण यावर्षी अतिवृष्टीमुळे दिवाळी तोंडावर येऊन शेतकऱ्यांच्या घरात कापूस आलेला नव्हता. त्यामुळे शेतकऱ्यांना दिवाळी साजरी करण्यासाठी खासगी व्यापाऱ्यांच्या दारात जाऊन वेचणी करण्यापूर्वीच कापसांचे सौदे करावे लागले. शेतकऱ्यांची गरज ओळखून व्यापाऱ्यांनी हमीभावापेक्षा कितीतरी कमी भावाने हे सौदे केले. यात शेतकरीच नागवला जात आहे.
व्यापाऱ्यांकडून शेतकऱ्यांची होतेय आर्थिक लूट
शासनाने अद्याप कापूस व सोयाबीन खरेदी सुरू केली नाही. त्यामुळे शेतकऱ्यांना आर्थिक खर्च भागविण्यासाठी आपला माल खासगी व्यापाऱ्यांना विकावा लागत आहे. मात्र, शेतकऱ्यांच्या याच परिस्थितीचा फायदा घेऊन खासगी व्यापारी अत्यंत कमी भावात शेतकऱ्यांच्या मालाची खरेदी करीत आहेत. खासगी व्यापाऱ्यांकडून सोयाबीनला केवळ ३ ते ४ हजार आणि कापसाला ५ ते ६ हजार रुपये भाव देण्यात येत आहे. त्यामुळे व्यापाऱ्यांकडून शेतकऱ्यांची आर्थिक पिळवणूक होत आहे.
