खोट्या स्वाक्षऱ्या करून काढले जाते वेतन
ग्रामस्थांमध्ये संतापाचा ज्वालामुखी
अमरावती / जिल्हा प्रतिनिधी
धारणी तालुक्यातील बैरागड प्राथमिक आरोग्य केंद्र हे आरोग्यसेवेसाठी स्थापन झालेले महत्त्वाचे केंद्र. मात्र, येथे नियुक्त असलेल्या महिला वैद्यकीय अधिकारी डॉ. प्रज्ञा भगवान वाकोडे (भगत) आणि त्यांचे पती डॉ. धम्मदीप भगत या दोघांचा गंभीर निष्काळजीपणा धक्कादायक आहे.डॉ. प्रज्ञा वाकोडे या रुग्णांना सेवा न देता, महिने- महिने मुख्यालयी गैरहजर राहूनही यांचे वेतन नियमितपणे काढले जात असल्याचा गंभीर आरोप ग्रामस्थांनी केला आहे.ग्रामस्थांनी दिलेल्या माहितीनुसार डॉ. प्रज्ञा वाकोडे सलग दोन-दोन महिने केंद्रावर अनुपस्थित राहतात. त्या फक्त शासकीय सुट्यांच्या दिवशी बैरागडला येतात आणि “कर्तव्यावर आहे” असा आभास निर्माण करतात. प्रत्यक्षात अमरावतीत वास्तव्यास राहून मुलीच्या शिक्षण व संगोपनाचे त्या कर्तव्य निभावतात. याच काळात, हजेरी रजिस्टरवर खोट्या स्वाक्षऱ्या करून वेतन काढले जाते, असा आरोप स्थानिकांनी केला आहे.गंमत म्हणजे, इतकी मोठी गैरहजेरी असूनही ना तालुका वैद्यकीय अधिकारी, ना जिल्हा आरोग्य प्रशासन कारवाई करताना दिसत आहे. उलट या दोन्ही अधिकाऱ्यांचे दर महिन्याला पगार वेळेवर खात्यात जमा होतात हे विशेष!सामान्य कर्मचारी दोन दिवस गैरहजर राहिला तरी नोकरीवर गदा येते. मग बैरागड प्रकरणी अनेक महिने अनुपस्थित राहणाऱ्या या डॉक्टरांवर शासन मूक-बधीर का झाले आहे? त्यांना शासकीय सेवेत का सोसले जात आहे?”हा प्रकार नवीन नाही तर गेल्या अनेक वर्षांपासून सुरू असल्याचे ग्रामस्थांनी स्पष्ट केले आहे. आरोग्य केंद्रात सेवा ठप्प, गावकऱ्यांची अडचण वाढलेली आणि अधिकारी मात्र निवांत…! या गंभीर प्रकरणामुळे बैरागड आरोग्य केंद्रावर प्रचंड प्रश्नचिन्ह उभे राहिले असून शासनाच्या कारभाराविषयी ग्रामस्थांमध्ये संतापाचा ज्वालामुखी उसळला आहे.
मातामृत्यू व बालमृत्यूला डॉ. वाकोडेच जबाबदार
मागील पाच महिन्यात दहा बालमृत्यू व एक मातामृत्यू झाला. या आधी सुद्धा अनेक घटना उघडकीस आल्या. डॉ. प्रज्ञा वाकोडे या मुख्यालयी उपस्थित राहत नसल्यामुळे बालमृत्यू व मातामृत्यूचे प्रमाण वाढलेले आहे.प्रसूतीची सुविधा रुग्णालयात उपलब्ध असतांना त्यांना धारणी येथील उपजिल्हा रुग्णालयात रेफर करण्याचा प्रताप डॉ. वाकोडे व त्यांचे पती डॉ. भगत करतात त्यामुळे अनेकदा रस्त्यातच प्रसूती झाल्या आहेत. आजवर झालेल्या बालमृत्यू व मातामृत्यूला डॉ. वाकोडे जबाबदार असून त्यांच्यावर फौजदारी गुन्हा दाखल करावा अशी मागणी गावकऱ्यांनी केली आहे.
