वैद्यकीय अधिकाऱ्यांचा निष्काळजीपणा भोवला
जिल्हा आरोग्य यंत्रणा सलाईनवर
अमरावती/ जिल्हा प्रतिनिधी
धारणी तालुक्यातील बैरागड प्राथमिक आरोग्य केंद्रात गेल्या पाच महिन्यांपासून आरोग्य व्यवस्थेचा बोजवारा वाजला आहे, वैद्यकीय अधिकाऱ्यांच्या निष्काळजीपणा व बेजबाबदारपणामुळे पाच महिन्यात आतापर्यंत दहा बालमृत्यू झाले आहेत. त्यासोबतच एका गर्भवतीचा रस्त्यात मातामृत्यू झाल्याची धक्कादायक बाब समोर आली आहे. स्थानिक ग्रामस्थांमध्ये या घटनांमुळे प्रचंड संताप असून प्रशासन मात्र मौन आहे.एवढी गंभीर बाब असून देखील केवळ कागदी घोडे नाचवण्यात येत असून खऱ्या अर्थाने जिल्हा आरोग्य प्रशासन सलाईनवर असल्याचे वास्तव आहे.बैरागड येथे नियुक्त असलेल्या वैद्यकीय अधिकारी डॉ. प्रज्ञा भगवान वाकोडे (भगत) या वारंवार दोन-दोन महिने मुख्यालयी गैरहजर राहतात. गावोगावी दौरे करणे तर दूरच, पण त्या आरोग्य केंद्रातील नियमित बैठकींनाही उपस्थित नसल्याचे स्थानिकांचे म्हणणे आहे. तरीदेखील त्यांना दरमहा नियमित पगार मिळत असल्याचा प्रकार समोर आला आहे.बैरागड येथील आरोग्य केंद्रात गरोदर माता प्रसूतीसाठी आल्यास त्यांची आरोग्य केंद्रात प्रसूती न करता त्यांना थेट धारणी येथील उपजिल्हा रुग्णालयात रेफर करण्यात येते.या गंभीर प्रकारामुळे ३ आणि १० सप्टेंबर रोजी दोन गरोदर मातांची प्रसूती ही ऐन रात्रीच्या वेळी रस्त्यातच झाली.३० जुलै रोजी भोंडीलावा येथील १२ वर्षीय अस्मिता कमलसिंग दारसींबे या दोन वर्षीय रुग्णाला कुटुंबीयांनी उपचारासाठी सकाळी बैरागड आरोग्य केंद्रात उपचारासाठी आणले होते. मात्र महिला डॉक्टर अनुपस्थित असल्याने योग्य उपचार मिळाले नाहीत. नाईलाजाने कुटुंबीयांनी तिला खासगी रुग्णालयात नेले, पण रात्री उशिरा अस्मितेचा मृत्यू झाला. अशा प्रकारे गेल्या पाच महिन्यांत दहा बालमृत्यू झाल्याने परिसरात खळबळ माजली आहे.दरम्यान, ३ एप्रिल रोजी एका गर्भवती महिलेला उपचार न मिळाल्याने प्रसूतीदरम्यान रस्त्यातच मृत्यू झाला होता. या घटनांनंतरही आरोग्य विभागाकडून कोणतीही कारवाई न झाल्याने ग्रामस्थांनी तीव्र नाराजी व्यक्त केली आहे. या सर्व परिस्थितीमुळे आदिवासी समाज आरोग्य सेवेकडे पाठ फिरवून पुन्हा अंधश्रद्धेकडे वळत आहे.औषधोपचाराऐवजी बुवाबाजीकडे त्यांचा कल वाढत आहे. याचे थेट कारण म्हणजे निष्काळजी वैद्यकीय अधिकारी असल्याचा आरोप ग्रामस्थ करत आहेत.गेल्या काही महिन्यांपासून बालमृत्यू आणि मातामृत्यूंची मालिका सुरू असून तरीदेखील आरोग्य विभाग कारवाई करण्याऐवजी गप्प बसलेला दिसत आहे. “निष्पाप जीवांचा बळी जात असताना प्रशासन मौन का?” असा थेट सवाल ग्रामस्थांनी उपस्थित केला आहे.
बालमृत्यूचा निश्चित आकडा नाही,मातामृत्यू एकही नाही
मेळघाटात बालमृत्यू हे जन्मजात व्यंग किंवा कमी दिवसांचा जन्म यामुळे होतात.बैरागड आरोग्य केंद्र अंतर्गत पाच महिन्यात किती बालमृत्यू झाले यांचा निश्चित आकडा माहीत नाही मात्र मातामृत्यू एकही नाही.
डॉ.तिलोत्तमा वानखडे
तालुका आरोग्य अधिकारी, धारणी
