महसूलमंत्री चंद्रशेखर बावनकुळे यांची घोषणा
उत्कृष्ट अधिकारी-कर्मचाऱ्यांचा सन्मान, अतिक्रमणमुक्ती आणि एम सँड धोरणाला चालना*
मुंबई/ प्रतिनिधी
महसूल विभागाच्या वतीने राज्यात एक ऑगस्ट रोजी ‘महसूल दिन ‘साजरा करण्यात येणार असून त्यानिमित्त महसूल सप्ताहाचे आयोजन करण्यात येणार आहे, अशी माहिती महसूल मंत्री चंद्रशेखर बावनकुळे यांनी पत्रकार परिषदेत दिली. हा सप्ताह शुक्रवार (दि. १) ते गुरुवार (दि. ७ ऑगस्ट) दरम्यान असणार आहे. या सप्ताह अंतर्गत विविध उपक्रम राबवले जाणार असल्याचे मंत्री बावनकुळे यांनी सांगितले.
*महसूल सप्ताह*
महसूलमंत्री बावनकुळे म्हणाले, की १ ऑगस्ट रोजी ‘महसूल दिना’निमित्त उत्कृष्ट कामगिरी करणाऱ्या आणि निवृत्त महसूल अधिकारी-कर्मचाऱ्यांचा सत्कार होईल. याच दिवशी विविध प्रमाणपत्रांचे वाटपही मान्यवरांच्या हस्ते केले जाईल. विद्यार्थ्यांना प्रमाणपत्रांसाठी ५०० रुपयांचा स्टॅम्प पेपर लागणार नाही, असा महत्त्वाचा निर्णयही घेण्यात आला आहे.
*२ ऑगस्ट: अतिक्रमण नियमानुकूल करणार*
३१ डिसेंबर २०११ पूर्वी शासकीय जमिनीवर अतिक्रमण करून राहणाऱ्या पात्र नागरिकांना त्यांच्या घरांचे पट्टे वाटप केले जाणार आहेत. ‘प्रधानमंत्री सर्वांसाठी घरे’ योजनेअंतर्गत सुमारे ३० लाख नागरिकांना याचा लाभ मिळेल.
*३ ऑगस्ट: शेत रस्त्यांचे वाद मिटवणार*
‘पालकमंत्री शेत पाणंद रस्ते योजना’ अंतर्गत पाणंद आणि शिवपांदण रस्त्यांवरील वाद मिटवण्यासाठी तहसीलदार आणि उपविभागीय अधिकारी स्तरावर दोन अपीलनंतर अंतिम निर्णय घेतला जाईल. प्रत्येक शेताला १२ फुटांचा रस्ता मिळेल आणि त्यांना क्रमांक दिले जातील. रस्त्यांच्या दुतर्फा वृक्षारोपण होईल, आणि झाडे तोडल्यास वनविभागाच्या कायद्यांतर्गत कारवाई होईल. येत्या पाच वर्षांत एकही शेत रस्त्याविना राहणार नाही, असे बावनकुळे यांनी ठासून सांगितले.
*४ ऑगस्ट: छत्रपती शिवाजी महाराज महाराजस्व अभियान*
महसूल मंडळ स्तरावर शिबिरांचे आयोजन होऊन प्रलंबित प्रकरणे निकाली काढली जाणार आहेत. आधार कार्ड, संजय गांधी योजना ओळखपत्र, अधिवास, जात, उत्पन्न आणि जात वैधता प्रमाणपत्रांचे वाटप होईल. वर्षातून चार वेळा अशी शिबिरे आयोजित केली जाणार आहेत.
*५ ऑगस्ट: डिबिटी अडचणी दूर करणार*
विशेष सहाय्य योजनेअंतर्गत डिबिटी न झालेल्या लाभार्थ्यांच्या अडचणी सोडवण्यासाठी तलाठी घरोघरी भेटी देतील आणि आधार कार्ड बँकेशी लिंक करण्याची प्रक्रिया पूर्ण करतील.
*६ ऑगस्ट: शर्तभंग जमिनी परत घेणार*
शासकीय जमिनींच्या शर्तभंग प्रकरणांचे सर्वेक्षण होऊन अतिक्रमण किंवा शर्तभंग आढळल्यास त्या जमिनी शासनाकडे परत घेतल्या जाणार आहेत. यासाठी जिल्हाधिकाऱ्यांमार्फत काटेकोर कार्यवाही होईल.
*७ ऑगस्ट: एम सँड धोरण आणि सांगता समारंभ*
कृत्रिम वाळू (M-Sand) धोरणाची प्रभावी अंमलबजावणी करण्यासाठी कार्यशाळा आणि शिबिरांचे आयोजन होईल. १७ जुलै २०२५ च्या शासन निर्णयानुसार मानक कार्यप्रणाली (SOP) अवलंबली जाईल. महसूल सप्ताहाचा सांगता समारंभ आयोजित होऊन उल्लेखनीय कामगिरीची दखल घेतली जाईल.
*राष्ट्रनेता ते राष्ट्रपिता अभियान*
१७ सप्टेंबर (पंतप्रधान नरेंद्र मोदी यांचा वाढदिवस) ते २ ऑक्टोबर (राष्ट्रपिता महात्मा गांधी जयंती) २०२५ दरम्यान ‘राष्ट्रनेता ते राष्ट्रपिता अभियान’ राबवले जाणार आहे. यात महसूल कर्मचाऱ्यांसाठी फेस ॲपद्वारे उपस्थिती नोंदणी, गावठाणांचे ड्रोन सर्वेक्षण, आणि ग्रामीण भागातील प्रत्येक घराला मालमत्ता कार्ड देण्याचे काम दोन वर्षांत पूर्ण होईल.
*महसूल परिषदेत चर्चा*
मुख्यमंत्री देवेंद्र फडणवीस यांनी सहा विषयांवर अहवाल सादर करण्याच्या सूचना दिल्या होत्या. यावर २ आणि ३ ऑगस्ट रोजी नागपूर येथील महसूल परिषदेत सविस्तर चर्चा होईल. या उपक्रमांमुळे महसूल विभाग नागरिकांच्या जवळ येईल आणि शासकीय योजनांचा लाभ थेट लाभार्थ्यांपर्यंत पोहोचेल, असा विश्वास बावनकुळे यांनी व्यक्त केला.
