भाऊसाहेबांच्या जन्मगावी पापळ येथे मिळाले कृषी महाविद्यालय

श्री शिवाजी शिक्षण संस्थेच्या मागणीला मोठे यश

शिव परिवाराच्या स्वप्नाची पूर्तता _हर्षवर्धन देशमुख

अमरावती / उत्तम ब्राम्हणवाडे 

श्री शिवाजी शिक्षण संस्थेची महत्त्वाची मागणी राज्य सरकारने आज पूर्ण केली असून खऱ्या अर्थाने शिव परिवाराच्या स्वप्नाची ही पूर्तता आहे. भाऊसाहेबांच्या जन्मगावी म्हणजे पापळ येथे शासनाने आज अध्यादेश काढून कृषी महाविद्यालय सुरू करण्यास मान्यता दिली.ही श्री शिवाजी शिक्षण संस्थेसाठी मोठी उपलब्धी आहे. खऱ्या अर्थाने श्री शिवाजी शिक्षण संस्थेला आज मोठे यश प्राप्त झाले असून महाराष्ट्र शासनाचे विशेष आभार मानत असल्याची प्रतिक्रिया श्री शिवाजी शिक्षण संस्थेचे अध्यक्ष हर्षवर्धन देशमुख यांनी व्यक्त केली.महाराष्ट्र शासनाच्या कृषी, पशुसंवर्धन,दुग्ध विकास व मत्स्य व्यवसाय विभागाच्या वतीने आज जाहीर करण्यात आलेल्या शासन निर्णयानुसार डॉ. पंजाबराव देशमुख कृषी विद्यापीठ अकोला अंतर्गत श्री शिवाजी शिक्षण संस्थेस पापळ तालुका नांदगाव खंडेश्वर येथे कृषी महाविद्यालय सुरू करण्याची विशेष बाब म्हणून परवानगी देण्यात आली आहे.शिक्षण महर्षी डॉ.पंजाबराव उपाख्य भाऊसाहेब देशमुख यांच्या जन्म गावी म्हणजे पापळ येथे कृषी महाविद्यालय सुरू व्हावे यासाठी श्री शिवाजी शिक्षण संस्थेच्या वतीने गेल्या अनेक वर्षापासून प्रयत्न करण्यात येत होते. अखेर श्री शिवाजी शिक्षण संस्थेचे अध्यक्ष हर्षवर्धन देशमुख यांच्या नेतृत्वातील कार्यकारिणीला हे यश मिळाले. शासनाने निर्गमित केलेल्या शासन निर्णयामध्ये काही अटी व शर्तीवर ही मान्यता प्रदान करण्यात आली आहे. सत्र 2025_2026 पासून 60 विद्यार्थी प्रवेश क्षमतेच्याअटीवर हे कृषी महाविद्यालय कायमस्वरूपी,विनाअनुदानित तत्त्वावर सुरू करण्यास मान्यता प्रदान करण्यात आली आहे.

महाराष्ट्र शासनाचे विशेष आभार

श्री.शिवाजी शिक्षण संस्थेच्या मागणीची दखल घेत पापळ येथे कृषी महाविद्यालय सुरू करण्याची मान्यता प्रदान केल्याबद्दल श्री शिवाजी शिक्षण संस्थेचे अध्यक्ष हर्षवर्धन देशमुख यांनी महाराष्ट्र शासनाचे विशेष आभार मानले आहे. उल्लेखनीय म्हणजे गेल्या वर्षी भाऊसाहेब देशमुख यांच्या पुण्यतिथी सोहळ्यात तत्कालीन उपमुख्यमंत्री देवेंद्र फडणवीस यांनी पापळ येथे लवकरच कृषी महाविद्यालय सुरू करू असे आश्वासन दिले होते. आज ही मागणी पूर्ण झाल्याबद्दल श्री शिवाजी शिक्षण संस्थेच्या संपूर्ण कार्यकारिणीने मुख्यमंत्री देवेंद्र फडणवीस व महाराष्ट्र शासनाचे आभार मानले. यासोबतच या मागणीच्या पूर्तते करिता ज्यांचे विशेष सहकार्य लाभले असे आ. प्रताप अडसड व आ. रणधीर सावरकर यांचे देखील संस्थेच्या वतीने विशेष आभार मानण्यात आले.

पेढे भरून व्यक्त केला आनंद

दरम्यान श्री शिवाजी शिक्षण संस्थेला पापळ येथे कृषी महाविद्यालय सुरू करण्याची परवानगी मिळाल्याने श्री शिवाजी शिक्षण संस्थेमध्ये आज आनंद व्यक्त करण्यात आला. संस्थेचे पदाधिकारी, कार्यकारिणी सदस्य ,सर्व अधिकारी आणि कर्मचाऱ्यांनी एकमेकांचे अभिनंदन करत पेढे भरून आनंद साजरा केला.श्री शिवाजी शिक्षण संस्थेच्या मुख्य कार्यालयात आज आनंद उत्सव साजरा करण्यात आला यावेळी झालेल्या कार्यक्रमाला श्री शिवाजी शिक्षण संस्थेचे अध्यक्ष हर्षवर्धन देशमुख, उपाध्यक्ष भैय्यासाहेब पाटील पुसदेकर , कोषाध्यक्ष दिलीप बाबू इंगोले, सचिव प्राचार्य वि.गो. ठाकरे, संस्थेच्या अधीक्षक भावना गावंडे, व सर्व कर्मचारी उपस्थित होते. श्री शिवाजी शिक्षण संस्थेला मिळालेल्या या यशाबद्दल सर्व पदाधिकारी व कार्यकारणी सदस्यांचे सर्व स्तरातून अभिनंदन होत आहे.