सर्व शासकीय सेवा नागरिकांना सोयीनुसार उपलब्ध होण्यासाठी प्रत्येक तालुक्यात रिंग तयार करा- मुख्यमंत्री देवेंद्र फडणवीस
मुंबई / मंत्रालय प्रतिनिधी
राज्य शासनाच्या विविध विभागांकडून नागरिकांना सेवा पुरवल्या जातात. या सेवांसाठी आपले सरकार हे पोर्टल असून या पोर्टलवरील सर्व सेवा व्हॉट्सअँप च्या माध्यमातून पुरवण्यात याव्यात. तसेच सर्व सेवा योग्य प्रकारे आणि गरजे नुसार पुरवण्याच्या दृष्टीने सर्व तालुक्यांमध्ये एक रिंग तयार करण्यात यावे, अशा सूचना मुख्यमंत्री देवेंद्र फडणवीस यांनी दिल्या.वर्षा निवासस्थानी सेवा सुलभीकरणासाठी मुख्यमंत्री फडणवीस यांनी आज राज्यातील नागरिक सेवांचा आढावा घेण्यासाठी बैठक घेतली. यावेळी मुख्यमंत्री फडणवीस यांनी या सूचना दिल्या.बृहन्मुंबई महानगर पालिकेच्या एकाच प्रकारच्या ९ सेवा एकत्र करण्याच्या सूचना देऊन मुख्यमंत्री फडणवीस म्हणाले की, सेवा पुरवठ्याच्या गुणवत्तेची खात्री करण्यासाठी त्रयस्थ संस्थेमार्फत नियमितपणे पडताळणी करण्यात यावी, तसेच अर्ज प्रक्रियेत लागणारी कागदपत्रांची संख्या लक्षणीयरीत्या कमी करण्यासाठी नियोजन करावे. सर्व जिल्हा परिषद, महापालिका आणि विद्यापीठांचे डॅशबोर्ड एकसमान असावेत, जेणेकरून राज्यभरातील नागरिकांना एकसंध अनुभव मिळेल, या सेवेच्या प्रभावी अंमलबजावणीसाठी रिंग व क्लस्टर प्रणाली राबवण्यात यावे. रिंगमध्ये सुरवातीस त्या तालुक्यातील १० ते १२ गावांचं समावेश असावा व गरजेनुसार सेवा पुरवण्यात याव्यात. या रिंगच्या व्यवस्थापनासाठी स्वतंत्र गट व व्यवस्थापन टीम तयार करावी. तसेच सेवा पुरवण्यासाठी डिश डिजिटल सेवा हबचा वापर करण्याच्या सूचनाही मुख्यमंत्री फडणवीस यांनी दिल्या.
मुख्य सचिव राजेश कुमार यांनी सेवा वितरणात अपीलची सुविधा उपलब्ध करून देण्याचे आणि प्रमाणपत्र वितरणासाठी मल्टी-मॉडेल प्रणाली (जसे की ईमेल, पोर्टल, व्हॉट्सअॅप) वापरण्याच्या सूचना केल्या.आपले सरकार पोर्टलच्या माध्यमातून साध्य राज्यात 1001 सेवा पुरवण्याचे काम सुरू असून त्या पैकी ९९७ सर्व पोर्टल वर उपलब्ध करून देण्यात आल्या आहेत. गेल्या पंधरा दिवसा मध्ये पोर्टलवर उपलब्ध असलेल्या सेवांमध्ये २३६ सेवांची वाढ झाली आहे.
यावेळी राज्य सेवा हक्क आयोगाचे आयुक्त मनुकुमार श्रीवास्तव, बृहन्मुंबई महानगरपालिकेचे आयुक्त भूषण गगरानी, अपर मुख्य सचिव (नियोजन) राजगोपाल देवरा, सामाजिक न्याय विभागाचे प्रधान सचिव हर्षदीप कांबळे, माहिती तंत्रद्न्यान विभागाचे प्रधान सचिव पराग जैन नैनुटीया, महा आयटी चे व्यवस्थापकीय संचालक संजय काटकर आदी मान्यवर उपस्थित होते.
