नांदगाव खंडेश्वर नगर पंचायत निवडणूक
विकासासाठी धडाडीचे निर्णय घेणारे हवे नेतृत्व
नांदगाव खंडेश्वर/उत्तम ब्राम्हणवाडे
नांदगाव खंडेश्वर पंचायतीच्या आगामी निवडणुकीत आतापर्यंतच्या इतिहासाप्रमाणे तेच तेच चेहरे पुन्हा रिंगणात उतरवण्याऐवजी, युवा आणि नवीन चेहऱ्यांना संधी दिल्यास शहराच्या विकासाची दिशा बदलू शकते, अशी चर्चा सध्या शहरात जोर धरत आहे. जुन्या चेहऱ्यांमुळे शहरावर असलेली एकाधिकारशाही (एकसत्ता) संपुष्टात येऊन शहर विकासाला चालना मिळेल, अशी आशा नागरिक व्यक्त करत आहेत.शहरातील जाणकार आणि सामान्य नागरिकांच्या मते, मागील अनेक वर्षापासून सत्ताधारी पक्ष तसेच विरोधी पक्षांनीही वारंवार तेच तेच चेहरे निवडणुकीत दिले आहेत. काही उमेदवारांनी तर पक्ष बदलूनही आपली जागा टिकवून ठेवली आहे. त्यामुळे शहराच्या मूळ समस्यांकडे दुर्लक्ष झाल्याचे चित्र आहे. शहराच्या विकासासाठी आणि समस्या सोडविण्यासाठी नागरिकांना आता नवीन नेतृत्वाची गरज जाणवत आहे. शहरात ठिकठिकाणी मोठ्या प्रमाणात अतिक्रमण वाढले आहे. ज्यामुळे वाहतूक आणि पादचाऱ्यांना त्रास होतो. त्यामुळे अतिक्रमण हटवून शहर विकासासाठी धडाडीने निर्णय घेणारे नेतृत्व शहरवासीयांना अपेक्षित आहे. त्यामुळे निवडणुकांना अधिक महत्त्व आले आहे.
जिथे-तिथे कचऱ्याचे ढिगारे
नांदगाव खंडेश्वर शहरात सर्वत्र कचऱ्याचे ढीग साचलेले दिसत आहेत. नाल्याची नियमित साफसफाई नाही. अनेक प्रभागातील स्ट्रीट लाईटबंद आहेत आणि आरोग्याच्या समस्या निर्माण होत आहेत.
नवीन होतकरू चेहऱ्यांची गरज
शहराचा भकास चेहरा बदलण्यासाठी आता प्रत्येक पक्षाने राजकीय इच्छाशक्ती दाखवून युवा आणि कार्यक्षम उमेदवारांना संधी देणे आवश्यक आहे. नवीन उत्साही आणि शहराच्या समस्यांची जाण असलेल्या नेतृत्वामुळे शहराला एकाधिकारशाहीतून मुक्त करून खऱ्या अर्थाने विकसित करण्याची संधी मिळू शकते. निवडणुकीत कोणत्या पक्षाचे नेतृत्व नवीन चेहऱ्यांना संधी देऊन शहराच्या विकासाला प्राधान्य देते, याकडे आता शहरवासीयांचे लक्ष लागले आहे.
कचरा, रस्ते व जनावरांची समस्या गंभीर
नगरपंचायतची विविध प्रकारची थकबाकी प्रभावीपणे वसूल होत नसल्यामुळे विकासकामांसाठी आवश्यक निधीची कमतरता भासत आहे. शिवाय, शहरातील रस्ते उखडलेले आहेत.कचऱ्याचे ढिगार लागून राहते, रस्त्यावर मोकाट जनावर व कुत्र्यांपासून धोका आहे. यासह अन्य कित्येक समस्यांना नागरिकांना तोंड द्यावे लागत आहे.
पक्ष बदलून आलेल्या नेतृत्वाकडूनही अपेक्षाभंग
अनेकांना अशी अपेक्षा होती की, नवीन चेहऱ्यांना संधी दिली जाईल आणि शहराचा विकास साधला जाईल. मात्र, सर्वांकडून सध्या तरी जुन्याच चेहऱ्यांना प्राधान्य देण्याच्या हालचालीमुळे नागरिकांमध्ये अपेक्षाभंग झाल्याची भावना आहे.
