शासनाला कोट्यवधी रुपयांचा फटका
ट्रकमालकांनी उघडकीस आणला राखेचा काळाबाजार
नांदगाव पेठ/मंगेश तायडे
नागपूर जिल्ह्यातील मौदा येथील शासकीय ऊर्जा प्रकल्पातून रहाटगाव येथील उड्डाणपुलाच्या बांधकामासाठी विनामूल्य पुरविण्यात येणारी राख सर्रासपणे विक्री करत असल्याचा धक्कादायक प्रकार रविवारी उघडकीस आला. जांडू कन्स्ट्रक्शन कंपनीच्या कर्मचाऱ्यांमार्फत स्थानिक वीटभट्टयांना तसेच व्यावसायिकांना सर्रासपणे पाच हजार प्रति ट्रकप्रमाणे ही राख विक्री केल्या जात होती. मात्र काही ट्रक मालकांच्या लक्षात हा प्रकार येताच त्यांनी रविवारी दुपारी ४ वाजता राखेच्या ठिय्यावर धडक दिली असता हा प्रकार उजेडात आला. जांडू कन्स्ट्रक्शन कंपनीच्या वतीने काम सुरू असलेल्या रहाटगाव येथील उड्डाणपुलाच्या या प्रकल्पात गेल्या दोन महिन्यांपासून चार ते पाच हजार रुपये प्रति ट्रक या दराने राख विक्रीचा काळाबाजार सुरू असल्याची माहिती स्थानिक चालकांनी दिली. रविवारी दुपारी चारच्या सुमारास भाजप ट्रान्सपोर्ट सेलचे जिल्हा संयोजक राजू चिरडे तसेच नांदगाव पेठ ग्रामपंचायत सदस्य बलविर चव्हाण यांनी रहाटगाव येथील प्रकल्पावर अचानक धडक दिली असता , कामगारांना ट्रकमध्ये राख भरताना रंगेहात पकडले.अचानक ट्रकमालक व नागरिकांनी टाकलेल्या या धाडसत्रामुळे संबंधित कंत्राटदार आणि कर्मचारी घटनास्थळावरून पळून गेले.त्याठिकाणी उभ्या असलेल्या चालकांनी राख विक्रीच्या संपूर्ण व्यवहाराची कबुली देत जांडू कन्स्ट्रक्शन कंपनीचे कर्मचारी सुधांशु द्विवेदी,अग्नेश यादव यांच्या फोन पे वर जमा झालेल्या रकमेचे स्क्रीनशॉटही दाखवले.
या व्यवहाराद्वारे दररोज लाखो रुपयांची उधळण होत असल्याची माहितीही समोर आली आहे.दररोज वीस ते पंचवीस ट्रक राख येथून विक्री होत असल्याची माहिती उपस्थित ट्रकचालकांनी दिली.सुरुवातीला एक हजार रुपये दराप्रमाणे व नंतर आता पाच हजार रुपये दराने येथून अवैधरीत्या राख विक्री होत असल्याचा गंभीर प्रकार निदर्शनास आला.राष्ट्रीय राजमार्ग प्राधिकरण च्या वतीने जांडू कन्स्ट्रक्शन कंपनी कडे उड्डाणपूल बांधण्याचा कंत्राट असून या बांधकामासाठी लागणारी राख ही मौदा येथील वीज प्रकल्पातून पुरविण्यात येते. मात्र येथील कंत्राटदार आणि कर्मचारी ही राख परस्पर वीटभट्टी मालक व व्यावसायिकांना विकत असून या गंभीर घोटाळ्यामुळे शासनाला तब्बल कोट्यवधी रुपयांचा फटका बसत आहे.घटनास्थळी पोलिसांना पाचारण करण्यात आले होते.पोलिसांनी घडलेल्या प्रकाराची माहिती घेतली मात्र रात्री उशिरापर्यंत कोणत्याही प्रकारचा गुन्हा दाखल करण्यात आलेला नव्हता. या प्रकारामुळे उड्डाणपुलाच्या कामाची गुणवत्ता, सुरक्षितता आणि विश्वसनीयतेवरही गंभीर प्रश्नचिन्ह उभे राहत आहे.
कंत्राटदाराला काळ्या यादीत टाकावे
शासकीय कामात वापरण्यात येणारी राख परस्पर विकणे कायद्याने गुन्हा आहे.रविवारी उघडकीस आलेल्या या राख घोटाळ्याची चौकशी व्हावी,संपूर्ण व्यवहाराचा उच्चस्तरीय तपास करावा, कंत्राटदारांना काळ्या यादीत टाकावे आणि संबंधित अधिकाऱ्यांवर तातडीने कारवाई करावी अशी मागणी नांदगाव पेठ ग्रा.पं.सदस्य बलविर चव्हाण आणि राजू चिरडे यांनी केली आहे.
उडणाऱ्या राखेचा बंदोबस्त नाही
जांडू कन्स्ट्रक्शन कंपनीने सुरुवातीला अवैधरित्या राख संकलित केली होती.माध्यमांनी हा प्रकार उचलून धरल्यानंतर व्यवस्थापनाने राख उडू नये यासाठी थातुरमातुर उपाययोजना केल्या होत्या मात्र अजूनही त्या उडणाऱ्या राखेचा बंदोबस्त करण्यात आलेला नाही. यामुळे प्रवास्यांनाअजूनही आपला जीव घोक्यात घालून प्रवास करावा लागत आहे याकडे जिल्हा प्रशासनाने तात्काळ लक्ष द्यावे अशी मागणी जोर धरू लागली आहे.
