चांदूर रेल्वे /तालुका प्रतिनिधी
“चला जाऊ सावंगपुरी, गडे हो भक्तांचे माहेरी… तिथे नांदतो हरी, हेच होय पुण्याची पायरी!”
या ओवीने भरलेल्या भक्तिरसात यंदा कार्तिक अमावास्या निमित्त श्री क्षेत्र सावंगा (विठोबा) नगरीत पारंपरिक चंदनउटी उत्सवाचा सोहळा उत्साहात साजरा होणार आहे.श्री विठोबा संस्थानतर्फे दरवर्षीप्रमाणे यंदाही विशेष धार्मिक कार्यक्रमांचे आयोजन करण्यात आले आहे. गुरुवार, दि. २० नोव्हेंबर २०२५ रोजी दुपारी ४ वाजता विधीपूर्वक उत्सवाची सुरुवात होईल. अवधूत परंपरेच्या भजनगायनाने संपूर्ण परिसर भक्तिमय वातावरणात न्हाऊन निघणार आहे.सावंगपूर नगरीला भाविकांचे माहेर मानले जाते. त्यामुळे परिसरातीलच नव्हे तर दूरदूरच्या जिल्ह्यांतूनही भक्तांचा मोठा ओघ यावेळी पाहायला मिळतो, भाविकांच्या सोयीसाठी सायंकाळी ६ वाजता महाप्रसादाचे आयोजन करण्यात आले असून, यासाठी अन्नदानदाते ऋतुज रितेश शेलारे, रा. यवतमाळ यांनी पुढाकार घेतला आहे. तसेच संस्थानच्या महाप्रसाद नियोजन समितीने व्यापक तयारी केली आहे.संस्थानच्या वतीने सर्व भाविकांना या पवित्र सोहळ्यात तन-मन-धनाने उपस्थित राहून भक्तीचा आनंद लुटण्याचे आवाहन करण्यात आले आहे.दरम्यान, सावंगपूर नगरीतील भाविकांच्या निवासासाठी संस्थान मोठा निर्णय अमलात आणत आहे. धर्मशाळा तसेच सर्व सुविधा असलेले पाच मजली ‘भक्तनिवास’ बांधकाम लवकरच सुरू होणार असल्याची माहिती विश्वस्त मंडळाने दिली. यामुळे यात्रेकरूंसाठी निवासाची अडचण मोठ्या प्रमाणात दूर होणार आहे.या सर्व कार्यक्रमांना उत्स्फूर्त सहकार्य करण्याचे आवाहन संस्थानचे अध्यक्ष पुंजाराम नेमाडे, उपाध्यक्ष कृपासागर राऊत, सचिव अशोक सोनवाल, तसेच विश्वस्त विनायक पाटील, वामन रामटेके, गोविंद राठोड, फुलसिंग राठोड, चरणदास कांडलकर, प्रविण कुकडकर, लक्ष्मण राठोड, वैभव मानकर व स्वप्नील चौधरी यांनी केले आहे.
