आखाडा नगर पंचायत निवडणुकीचा :वातावरण तापले!
नांदगाव खंडेश्वर / उत्तम ब्राम्हणवाडे
नांदगाव खंडेश्वर नगर पंचायत निवडणुकीच्या तोंडावर शहरातील राजकीय तापमान चांगलेच वाढले आहे. निवडणुकीची तारीख जाहीर होताच राजकीय पक्षांचे कार्यकर्ते जोशात मैदानात उतरले आहेत.शहरातील गल्लीबोळात, चौकाचौकात आता एकच चर्चा रंगू लागली आहे. या वेळी तिकीट कुणाला मिळणार? हाडाच्या कार्यकर्त्याला की लाडाच्या कार्यकर्त्याला?निवडणुकीची रंगीत तालीम आता खऱ्या अर्थाने रंगात आली आहे. विविध पक्षांचे इच्छुक उमेदवार आपल्या नेतृत्वाकडे तिकीट मिळवण्यासाठी प्रयत्नांची पराकाष्ठा करत आहेत. कुणी वरिष्ठ नेत्यांच्या भेटी घेत आहेत, तर कुणी सोशल मीडियावर आपला प्रभाव दाखवण्याचा प्रयत्न करत आहेत.स्थानिक पातळीवर काम करणाऱ्या कार्यकर्त्यांमध्ये मात्र तणाव आणि उत्सुकता दोन्ही वाढल्या आहेत.
हाडाचे विरुद्ध लाडाचे, जुना पण कायम चर्चेतला मुद्दा
पक्षांतर्गत कार्यकर्त्यांचे दोन प्रमुख गट सर्वत्र पाहायला मिळतात. त्यामध्ये प्रामुख्याने हाडाचे कार्यकर्ते आणि लाडाचे कार्यकर्ते.हाडाचे कार्यकर्ते म्हणजे जे वर्षानुवर्षे पक्षासाठी निस्वार्थीपणे काम करत असतात. प्रचाराची वेळ असो,सभा असो की ग्रामपातळीवरील कामे हे कार्यकर्ते नेहमी पुढे असतात.तर लाडाचे कार्यकर्ते हे सहसा नेतृत्वाच्या जवळचे असतात ‘खास माणसं’ मानले जाणारे असतात. हे कार्यकर्ते आपल्या कामधंद्यांमध्ये व्यस्त असले तरी नेता क्षेत्रात आला की त्याच्या स्वागतासाठी हटकून उपस्थित राहतात.आणि आपण किती जवळचे हे इतराना दाखविण्याचा प्रयत्न करत असतात.यामुळे आता हाडाचे कार्यकर्ते म्हणू लागले आहे “आम्ही आयुष्यभर पक्षासाठी झटतोय,आमचाच विचार झाला पाहिजे.”पण दुसरीकडे लाडाचे कार्यकर्तेही आपल्या प्रभावाचा वापर करत असून, नेतृत्वापर्यंत थेट पोहोचविण्याचा प्रयत्न करत आहेत. त्यामुळे नगर पंचायतमधील बहुतेक प्रभागांत “हाडाचा विरुद्ध लाडाचा” हा संघर्ष स्पष्टपणे दिसू लागला आहे.
नांदगावमध्ये विविध पक्षांमध्येच चढाओढ
नांदगाव खंडेश्वर शहरातील राजकारण परंपरेने चुरशीचे राहिले आहे. स्थानिक पातळीवर अनेक पक्ष सक्रिय असले तरी मुख्य सामना मात्र भाजप आणि काँग्रेस यांच्यातच रंगतो.या दोन्ही पक्षांकडेच निवडून येण्याची शक्यता अधिक असल्याने तिकीटासाठीची स्पर्धा प्रचंड आहे.तसेच, कार्यकर्त्यांची नाराजी टाळण्यासाठी दोन्ही पक्षांचे नेतृत्वही निर्णय घेण्यास जरा सावध आणि सबुरीने पाऊले टाकताना दिसत आहे.दरम्यान,राष्ट्रवादी काँग्रेस (शरद पवार),आणि (अजित पवार),शिवसेना (शिंदे गट) आणि (उबाठा.गट), माकपा, वंचित बहुजन आघाडी, प्रहार जनशक्ती पक्ष आणि अपक्ष इच्छुक देखील आपला प्रभाव दाखवण्यासाठी सज्ज झाले आहेत. शहरातल्या काही प्रभागांमध्ये हे त्रिकोणी नव्हे तर चौरस लढतीचे संकेतही मिळत आहेत.
मतदारही सज्ज!
या साऱ्या चढाओढीत सर्वात जास्त उत्सुक मात्र जनता आहे. कोणाला तिकीट मिळते,कोण उमेदवारी भरणार आणि शेवटी कोण विजयी होतो. हे पाहण्यासाठी नांदगावातील मतदार चांगलाच उत्सुक दिसत आहे.निवडणुकीची रणधुमाळी सुरू होण्याआधीच चर्चा तापल्या आहेत, प्रचाराचे पोस्टर्स सजू लागले आहेत आणि पक्षांमध्ये गुप्त बैठका सुद्धा वाढल्या आहेत.
एकंदरीत पाहता नांदगाव खंडेश्वर नगर पंचायत निवडणुकीचा हा “आखाडा” सज्ज आहे.आता फक्त पाहायचं एवढंच की,तिकीट शेवटी कुणाला मिळतं हाडाच्या की लाडाच्या कार्यकर्त्यांना! हा एक महत्त्वाचा मुद्दा आहे.
